काठमाडौं : विपक्षी खेलाडी उपस्थित नभएपछि विभागीय टोली एपीएफ क्लबका दिपेश धामी र विजित थापामगरको जोडी अन्नपूर्ण पोस्ट् इन्टरनेसनल कर्पोरेट ब्याडमिन्टन प्रतियोगिताको पुरुष डबल्सतर्फ सजिलै सेमिफाइनलमा प्रवेश गरेको छ। दिपेश र विजितको जोडीसँग प्रतिस्पर्धा गर्ने प्रदेश नम्बर ४ का विशाल खड्का र भुगोल गुरुङको जोडी क्वार्टरफाइनल खेल्न कोर्टमा उपस्थित भएनन्।
भारतका जुम्ल्याहा दाजुभाइ रञ्जन र अञ्जन बुरागोहइको जोडी, बाँकेका रियाज अन्सारी र इरफान अन्सारीको जोडी तथा प्रदेश नम्बर ४ का विशाल बस्नेत र विधान अधिकारीको जोडी पनि प्रतियोगिताको अन्तिम चारमा पुगेका छन्। भारतका जुम्ल्याहा दाजुभाइको जोडीले बंगलादेशका मोहमद सलमान खान र प्रबोल हुसेन तालुकदारको जोडीलाई २१-१४, २१-११ अंकले हरायो। रियाज र इरफानको जोडीले स्लिकका गणेश रायमाझी र विश्वास नेपालको जोडीलाई २१-२३, २१-१७, २१-१८ ले पाखा लगायो। विशाल र विधानको जोडीले त्रिभुवन आर्मी क्लबका सुरोज महर्जन र राम राईको जोडीलाई २१-८, २१-१५ को सोझो सेटमा पराजित ग¥यो।
यसैगरी मिक्स डबल्सतर्फ शीर्ष वरीयतामा रहेका खेलाडीको जोडी सफल देखिए। एपीएफ क्लबका दिपेश धामी र पूजा श्रेष्ठको जोडी, त्रिभुवन आर्मी क्लबका अमिता गिरी र सुरज महर्जनको जोडी, त्रिभुवन आर्मी क्लबकै नङ्सल तामाङ र प्रफुल महर्जनको जोडी तथा एमआईबीसीका सीता राई र नीरविक्रम देवकोटाको जोडी सेमिफाइनलमा पुगेका छन्।
दिपेश र पूजाको जोडीले आर्मी क्लबकै अनु राई र रुकेश महर्जनको जोडीलाई २१-१७, २१-१५ तथा अमिता र सुरजको जोडीले नेपाल पुलिस क्लबका सुनयना मुखिया र बिष्णु कटवालको जोडीलाई १८-२१, २१-१३, २१-१५ अंकले पराजित गरे। नङ्सल र प्रफुलको जोडीले कामना सेवाका यामकुमारी गुरुङ र विशाल खड्काको जोडीलाई २१-१६, २१-९ तथा सीता र नीरविक्रमको जोडीले एपीएफ क्लबका शोभा गौचन र विजित थापामगरको जोडीलाई २२-२०, १४-२१, २१-१७ ले पराजित गरे।
प्रतिक्रिया दिनुहोस !
