काठमाडौं : विभागीय टोली एपीएफका दिपेश धामी अन्नपूर्ण पोस्ट् अन्तर्राष्ट्रिय कर्पोरेट ब्याडमिन्टन प्रतियोगिताअन्तर्गत युगलतर्फ थप दुई स्पर्धाको पनि फाइनलमा पुगेका छन् । उनी आफ्ना जोडीसँग मिलेर पुरुष युगल र मिक्स युगलतर्फको फाइनलमा पुगेका हुन् । यी दुवै स्पर्धाको उपाधिका लागि उनी शनिबार नै मैदानमा उत्रँदै छन् । दिपेशले पुरुष युगलतर्फ आफ्नो जोडी विजित थापामगरसँग मिलेर फाइनल यात्रा तय गरेका हुन् ।
दिपेश र विजितको जोडीले शुक्रबार भएको सेमिफाइनल खेलमा प्रदेश ४ का विशाल बस्नेत र विधान अधिकारीको जोडीलाई २१-१३, २४-२२ को सेटमा पराजित गर्यो । दिपेश र विजितको जोडीले उपाधिका लागि शनिबार भारतका जुम्ल्याहा दाजुभाइ रञ्जन र अञ्जन बुरागोहईसँग प्रतिस्पर्धा गर्नेछ ।
बुरागोहई दाजुभाइको जोडी शुक्रबार नै भएको अर्को सेमिफाइनल खेलमा बाँकेका रियाज अन्सारी र इरफान अन्सारीको जोडीलाई पराजित गर्दै प्रतियोगिताको अन्तिम दुईमा पुगेका हुन् । बुरागोहई दाजुभाइ जोडीले रियाज र इरफानको जोडीलाई २१-९, २१-१७ को सेटमा पराजित गरे ।
दिपेशले प्रतियोगिताअन्तर्गत मिक्स युगलमा भने पूर्व शीर्ष वरीयताकी पूजा श्रेष्ठसँग मिलेर फाइनल यात्रा तय गरेका हुन् । दिपेश र पूजाको जोडीले त्रिभुवन आर्मी क्लबका अमिता गिरी र सुरोज महर्जनको जोडीलाई २१-१६, २१-१६ को सहज सेटमा पराजित गर्दै फाइनल यात्रा तय गरेका हुन् ।
दिपेश र पूजाको जोडीले उपाधिका लागि शनिबार त्रिभुवन आर्मी क्लबका नङ्सल तामाङ र प्रफुल महर्जनको जोडीसँग प्रतिस्पर्धा गर्नेछन् । नङ्सल र प्रफुलको जोडीले भोजपुरकी सीता राई र एमआईबीएलका नीरविक्रम देवकोटाको जोडीलाई २१-१२, २१-१६ ले पराजित गर्दै फाइनल यात्रा तय गरे।
महिलातर्फ शीर्ष वरीयताकी खेलाडी नङ्सललाई जारी प्रतियोगितामा उपाधि जित्ने यो अन्तिम अवसर हो । नङ्सल महिला एकलतर्फ भने आफ्नै क्लबकी रसिला महर्जनसँग पराजित भएकी छन्।
प्रतिक्रिया दिनुहोस !
