काठमाडौं : साहसिक खेलका लागि अन्तर्राष्ट्रिय पर्यटन बजारमा परिचित बन्दै गएको पोखरा अहिले खेलकै माध्यमबाट चिनियाँ पर्यटक आकर्षण गर्न लागिपरेको छ । चिनियाँ खेलाडीलाई लक्षित गरी पोखरामा हिमालयन माउन्टेन क्रस कन्ट्री च्यालेन्ज खेल आयोजना गरिन लागिएको छ । पोखरासँग भगिनी सम्बन्ध रहेको चीनको खुनमिङस्थित खुनमिङ माउन्टेरिङ एसोसिएसनको आयोजनामा आगामी सेप्टेम्बरमा माउन्टेन क्रस कन्ट्री च्यालेन्ज प्रतियोगिता सञ्चालन हुँदैछ ।
४२ किलोमिटर दूरी दौड, साइक्लिङ र बोटिङ समावेश हुने यो प्रतियोगिता पोखराको फेवातालबाट सुरु भई पोखराका विभिन्न भागमा पुगी फेवाताल किनारमै पुगेर समापन हुनेछ । खुनमिङमा पर्यटक आकर्षण गर्न सञ्चालन गरिँदै आएको प्रतियोगिता पोखरा उद्योग वाणिज्य संघ र पश्चिमाञ्चल होटल संघ पोखराको सहआयोजनामा पर्यटकीय सहर पोखरामा हुन लागेको हो ।
हिमालयन माउन्टेन क्रस कन्ट्री खेलको माध्यमबाट पोखरामा चिनियाँ र विदेशी खेलाडीलाई भिœयाउने उद्देश्यले आयोजना हुन लागेको हो । प्रतियोगितामा एउटा समूहमा तीनजना सहभागी हुनेछन् । तीमध्ये एकजना महिला वा पुरुष अनिवार्य गरिएको छ । खुनमिङ माउन्टेरिङ एसोसिएनका विज्ञले पोखरामा आएर स्थलगत अध्ययनपछि प्रतियोगिता आयोजनाले पूर्णता पाउन लागेको पोखरा उद्योग वाणिज्य संघका अध्यक्ष विश्वशंकर पालिखेले बताए ।
‘रन फर लभ’ नारा राखिएको प्रतियोगितामा तीन सय खेलाडीको सहभागिता रहने जानकारी पनि पालिखेले दिए । प्रतियोगितामा चीनको खुनमिङ सहरबाट ४० जना खेलाडीको सहभागिता रहनेछ । यसैगरी खुनमिङ सहरसँग भगिनी सम्बन्ध रहेका विश्वका अन्य ४० देशबाट पनि खेलाडीको सहभागिता रहने आयोजकले जनाएको छ ।
‘पोखराको पर्यटन प्रवद्र्धन गर्न हामीले थालेको यो सानो प्रयास हो । पोखराको पर्यटन प्रवद्र्धनका लागि यो प्रतियोगिता कोशेढुंगा साबित हुनेछ । प्रतियोगिताबारे अन्तर्राष्ट्रिय सञ्चारमाध्यमबाट प्रवद्र्धनसमेत हुनेछ’, पालिखेले भने । प्रतियोगिता सञ्चालनका लागि हालै पोखरा उद्योग वाणिज्य संघ र खुनमिङ माउन्टेरिङ एसोसिएसनबीच समझौता पनि भएको छ । सम्झौतापछि खुनमिङ माउन्टेरिङ एसोसिएसनका अध्यक्ष झाङ सीले यो प्रतियोगिताले नेपाल र चीनबीचको सम्बन्ध अझ प्रगाढ बनाउने बताए ।
प्रतिक्रिया दिनुहोस !
