भक्तपुर : भक्तपुरको सूर्यविनायक नगरपालिका ८ सिपाडोलस्थित डोलेश्वर महादेव मन्दिर परिसरमा भारतको राजस्थानीमा प्रचलित देवदेवीका मन्दिर स्थापना गरिएको छ ।
उक्त मन्दिरमा राजस्थानमा प्रचलित शिव परिवारका पाँच देवीदेवीको मूर्ति स्थापना गरिएको छ । उक्त मन्दिर परिसरमा काठमाडौंको पशुपतिनाथस्थित महादेवको चारमुखे शिव लिंगसमेत स्थापना गरिएको छ ।
मन्दिरमा राजस्थानमा प्रचलित शिव परिवारअन्तर्गतका सालासर हनुमानजी, श्री श्याम बाबा, भीमेश्वरी षेरीवाली, रानीसती ढाढी र भैरवनाथको मूर्ति स्थापना गरिएको छ ।
उक्त मन्दिरलाई राजस्थानबाटै ल्याइएका ढुंगाले सिंगारिएका छन् । मन्दिर राजस्थानी शैलीमा निर्माण गरिएको छ । उक्त मन्दिर निर्माण गर्न सम्पूर्ण निर्माण सामग्री राजस्थानबाटै ल्याइएको केदारनाथको शीर डोलेश्वर महादेव मन्दिर संरक्षण तथा विकास समितिका कोषाध्यक्ष विश्वराम थापाले जानकारी दिए ।
उनका अनुसार नेपाल मानव सेवा संघले धर्मशाला निर्माण गर्न किनेको जग्गामै उक्त मन्दिर निर्माण गरिएको छ । उक्त मन्दिरमा रहेका फरकफरक तीन परिवारले छुट्टाछुट्टै मूर्ति स्थापना गरेका छन् । जुन मन्दिर परिसरमा रहेको शिलालेखमा उल्लेख गरिएको छ ।
शिलालेखमा उल्लेख भएअनुसार मुरलीधर सिंधानियाले आफ्ना दिवंगत मातापिता गीतादेवी र बुद्धिरामजी सिंहानियाको स्मृतिमा सालासर हनुमानजी, रानीसती ढाढी र श्रीश्या बाबाको मूर्ति स्थापना गरेका छन् ।
त्यस्तै नन्दकिशोर र नरेशकुमार गोयलले आफ्ना दिवंगत मातापिता विमलादेवी र पूर्णमलजी गोयलको स्मृतिमा भैरवनाथको मूर्ति स्थापना गरेका छन् ।
यसैगरी स्वर्गीय गोविन्दराम नाहाडियाको स्मृतिमा उनकी श्रीमती केशरदेवी नाहाडिया र छोराहरु राजेश, उत्तम र राजेश नाहाडियाले उक्त मन्दिरमा भीमेश्वरी देवीको मूर्ति स्थापना गरेका छन् ।
मन्दिरमा स्थापना गरिएका देवदेवीमा गएको असार ३० गते प्राण प्रतिस्थापन गरी सर्वसाधारणको लागि खुला गरिएको कोषाध्यक्ष थापा बताउँछन् ।
डोलेश्वर महादेव मन्दिरमा गएको मंगलबारदेखि ३७ दिने श्रावणी मेला सुरु भएको छ । श्रावणी मेलामा डोलेश्वर मन्दिर पुग्ने सर्वसाधारण राजस्थानी मन्दिरमा पनि पूजाआजा गर्न पुग्ने गरेका छन् ।
डोलेश्वरमा नयाँ देवदेवीको मन्दिर भएकाले यो सर्वसाधारणको आकर्षणको केन्द्र बन्न पुगेको हो ।
प्रतिक्रिया दिनुहोस !
