एजेन्सी : तिरुअनन्तपुरम यौन शोषण र बलात्कारको आरोपमा दोषी ठहरिएका केरलका एक बिशपले पीडितालाई मुद्दा फिर्ता लिन दबाव दिएको खुलासा भएको छ । ननका आफन्तका अनुसार एक पादरीले फोन गरी उक्त मुद्दा फिर्ता लिन दबाव दिएको जानकारी दिएका छन् ।
बिशपविरुद्धको मुद्दा फिर्ता लिएमा उनलाई जमिन, घर र सुरक्षा दिने भन्दै लगातार फोन गर्ने गरेको उनीहरूले बताएका छन् । ती पादरीले ननलाई गरेको फोनको अडियो सार्वजनिक पनि भएको छ । राज्य प्रहरीले उक्त अडियो अनुसन्धान गरिरहेको छ । ४६ वर्षीया ननले जालन्धरका बिशप फ्र्यांको मुल्लाकलले सन् २०१४ देखि २०१६ को बीचमा १३ पटक यौनशोषण गरेको बताएकी छन् ।
आफूमाथि भएको अत्याचारको चर्चभित्र कुनै सुनुवाइ नभएपछि उनी प्रहरीसमक्ष पुगेकी थिइन् । चर्चभित्रका क्रियाकलाप बाहिर सार्वजनिक गर्न नमिल्ने प्रतिज्ञा गर्नुपर्ने भएको र केही उपाय नलागेपछि प्रहरीमा उजुरी गरेको ती ननको भनाइ छ । आफूविरुद्ध प्रहरीमा उजुरी परेपछि बिशपले ती नन लगायत अन्य ६ जनाविरुद्ध आफूलाई धम्क्याएको र सौदाबाजी गरेको भन्दै उल्टै अर्को उजुरी हालेका थिए ।
सार्वजनिक भएको अडियोमा एक पादरीले पीडिता ननलाई आफ्नो परिचय दिँदै फोन गर्छन् । उनले भनेका हुन्छन्, ‘हामीले केही जमिन किनेर घर बनाउन सक्छौं र सबैलाई उतै सार्न सक्छौं। यो तत्काल त हुँदैन, तर अझै केही समय बाँकी छ । यसबारेमा सोच्न सक्छ्यौ ।’ यदि मुद्दा फिर्ता नलिए ननमाथि खतरा हुने भन्दै पादरीले धम्की दिएका छन् । पादरीले भनेका छन्, ‘उनीहरू सहयोग गर्न तयार छन् ।’ ननले कसले सहयोग गर्ने भनेर प्रश्न गरेकी छन् । पादरीले त्यसको जवाफमा जालन्धरका मानिसहरू भनेर भनेका छन् ।
पादरीले जालन्धरमा १० एकड जग्गा किन्ने र त्यसमा भवन बनाउने बताएका छन् । यसका लागि पैसा आवश्यक हुने भएकाले त्यहाँका सहयोगीले मद्दत गर्ने उनको भनाइ थियो । फेरि उनले धम्काउँदै भन्छन्, ‘मुद्दा तत्काल फिर्ता लिनुपर्छ ।’ प्रहरीले कारबाही अघि बढाएपछि बिशपले आफू निर्दोष रहेको बताएका छन् । ननलाई कारबाही गरेकाले आफूविरुद्ध यस्तो मुद्दा अघि बढाइएको आरोप लगाएका छन् । उक्त अडियोका बारेमा भने बिशपले कुनै खण्डन गरेका छैनन् ।
प्रतिक्रिया दिनुहोस !
