राजविराज : पहिलो त्रैमासिक परीक्षा सम्पन्न भइसक्दा पनि सप्तरीका राजविराज नगरपालिकासहित एक दर्जन स्थानीय तहले शैक्षिक क्यालेन्डर तयार गरेका छैनन् । यसले गर्दा शैक्षिक कार्यक्रम प्रभावित भएको जनाइएको छ ।
स्थानीय तहको संरचना बन्नुअघि जिल्ला शिक्षा कार्यालयको समन्वयमा शैक्षिक क्यालेन्डर बन्ने गरेको थियो । संघीय संरचनामा स्थानीय तहको सामाजिक विकास शाखाअन्तर्गत शिक्षाले वार्षिक शैक्षिक क्यालेन्डर तयार गरी विद्यालयसम्बन्धी निर्णय गर्नुपर्ने व्यवस्था छ । तर, स्थानीय तहले क्यालेन्डर नबनाएपछि शैक्षिक गतिविधि प्रभावित भएको हो ।
परीक्षा मिति, नतिजा प्रकाशन र परीक्षाको समीक्षा, अतिरिक्त क्रियाकलाप, प्रधानाध्यापक बैठक, अभिभावकबीच अन्तक्र्रिया, बिदा, शैक्षिक कार्यतालिका, पाठ्यपुस्तक वितरण, भर्ना, लेखा परीक्षणलगायत कामको क्यालेन्डर तयार नभएका कारण काम प्रभावित भएको शिक्षक बताउँछन् । नौ नगरपालिका नौ गाउँपालिका रहेको सप्तरीमा सुरुंगा र खडक नगरपालिका तथा विष्णुपुर, तिरहुत, अग्निसाइर कृष्णासवरण र तिलाठी कोइलाडी गाउँपालिकाले मात्र शैक्षिक क्यालेन्डर तयार गरेको आरपी समाजका अध्यक्ष देवकुमार यादवले बताए ।
समयमा क्यालेन्डर तयार नहुँदा परीक्षा लिने र बिदा दिने विषयमा अन्योल भएको नरेन्द्र मेमोरियल जनता माविका प्रधानाध्यापक खिलानाथ गौतमले बताए । ‘क्यालेन्डर अभावमा विगतकै परम्पराअनुसार बिदा दिइँदा कतिपय विद्यालयलाई स्पष्टीकरण सोधिएको छ’, उनले भने, ‘समयमै क्यालेन्डर तयार पारिएको भए यो समस्या आउने थिएन ।’
त्रैमासिक परीक्षामा एकरूपतासमेत हुन नसकेको र वर्षे बिदा पनि सबै स्थानीय तहअन्तर्गतका विद्यालयमा आआफनै तरिकाले दिइएको शिक्षक बताउँछन् । क्यालेन्डर नभएपछि नयाँ विद्यालय खोल्न तथा कक्षा थप अनुमतिका लागि निवेदन पेस गर्न समस्या हुने भएको छ ।
आर्थिक वर्ष समाप्तिको समय र विकासका कामको चटारोका कारण शैक्षिक क्यालेन्डर बनाउन ढिलाइ भएको स्थानीय तहका प्रमुख स्वीकार गर्छन् । राजविराजका मेयर शम्भुप्रसाद यादवले समयमा क्यालेन्डरको काम गर्न नसकिए पनि साउनभित्रै ल्याउने गरी काम भइरहेको बताए ।
प्रतिक्रिया दिनुहोस !
