काठमाडौं : सनम शाक्य हत्याकाण्ड तथा साढे ३३ किलो सुुन तस्करी प्रकरण छानबिनका लागि गठित समितिले नेपाल अन्तर्राष्ट्रिय रूपमा नै ‘क्राइम सर्किट’ बनेको विश्लेषण गरेको छ ।
गृह मन्त्रालयका सहसचिव ईश्वरराज पौडेल संयोजकत्वमा गठित छानबिन समितिले सुन तस्करी मात्रै नभएर सिंगो अपराधमै नेपाल ‘सर्किट’ बन्न पुगेको विश्लेषणसहितको प्रतिवेदन बुधबार प्रधानमन्त्री केपी ओलीलाई बुझाएको छ ।
प्रतिवेदनमा नेपाल अपराधीको ‘सर्किट’ बन्न पुगेकाले अन्य देशको सहकार्यमा त्यस्ता अपराध नियन्त्रण गरी ‘क्राइम सर्किट’बाट मुुलुकलाई मुक्त गराउनुपर्ने आवश्यकता आंैल्याइएको छ ।
समितिको प्रतिवेदन ग्रहण गरेपछि प्रधानमन्त्री ओलीले आर्थिकलगायत सबै खालका अपराध नियन्त्रण गर्न गृहमन्त्री, गृहसचिव र प्रहरी प्रमुखलाई निर्देशन दिए । प्रतिवेदनमा संगठित सुन तस्करीको मुख्य कारक भारतीय बजार भएको र तस्करीका सुन अवैध रूपमा नेपाल, भारत, बंगालादेश र पाकिस्तानसम्म पुग्ने गरेको आंैल्याइएको छ ।
प्रतिवेदनमा नेपालको सुन बजारलाई राज्यपक्षबाट नियमित नियमन गर्नसमेत सुझाइएको छ । नेपाली बजारमा अवैध सुनको जगजगी रहेको समेत प्रतिवेदनले औंल्याएको छ । हुन्डी व्यापारलाई पूर्ण रूपमा नियन्त्रण नगर्दासम्म सुन तस्करीको जालो तोड्न कठिन हुने प्रतिवेदनमा उल्लेख छ । विमानस्थलमा अत्यधिक समस्या रहेकाले बहुनिकायबीच समन्वय गरी विमानस्थललाई सुशासनयुक्त बनाउनुपर्ने आवश्यकतासमेत आंैल्याइएको छ ।
उक्त अवसरमा प्रधानमन्त्री ओलीले सुन तस्करी र सनम हत्या प्रकरण गम्भीर खालको आर्थिक अपराध भएकाले उल्लेख गर्दै यस्ता आपराधिक घटना नियन्त्रण अत्यावश्यक रहेको बताए । सुरक्षा निकायले इमानदारीपूर्वक कार्यक्षेत्रमा खटिएर सबै प्रकारका अपराध नियन्त्रण गर्न सके मात्रै साख उँचो हुने उनको भनाइ छ ।
प्रधानमन्त्री ओलीले छानबिन समितिको अनुसन्धानपछि सुन तस्करीको जालो तोडिएको उल्लेख गरे । सुन तस्करी र संगठित अपराधका विभिन्न पाटालाई केलाएर तयार पारिएको प्रतिवेदन ७ सय ५२ पृष्ठको छ । चार महिना लगाएर समितिले तयार पारेको प्रतिवेदनमा घटनाको विस्तृत विवरण, तथ्य, सम्भावनालगायत आगामी दिनमा सुन तस्करीका अतिरिक्त आर्थिक अपराध रोक्न चाल्नुपर्ने कदम सुझाइएको छ ।
गत माघमा दुबईबाट नेपाल आएको साढे ३३ किलो सुन त्रिभुवन अन्तर्राष्ट्रिय विमानस्थलबाट हराएको र फागुनमा सनम शाक्यको हत्या भएपछि चैत २० मा मन्त्रिपरिषद्ले गृह मन्त्रालयका सहसचिव पौडेल संयोजकत्वमा समिति गठन गरी छानबिन थालेको थियो । समितिले अनुसन्धानका क्रममा सुन तस्करीका मुख्य अभियुक्त गोरे भनिने चूडामणि उप्रेती, भुजुङ गुरुङ, राजेन्द्रकुमार शाक्य, छिरिङ वाङ्दे तथा प्रहरीमा पूर्वप्रहरी नायब महानिरीक्षक गोविन्दप्रसाद निरौला, प्रहरी वरिष्ठ उपरीक्षक दिवेश लोहनी, श्याम खत्री, प्रहरी उपरीक्षक विकासराज खनाल, प्रहरी नायब उपरीक्षक प्रजित केसीलगायत ७५ जनाविरुद्ध मुद्दा दायर गरेको छ ।
प्रतिक्रिया दिनुहोस !
