राजविराज : विकासको बाधक भ्रष्टाचार र कमिशनतन्त्र मौलाएको सप्तरीमा पहिलोपटक एकजना वडा अध्यक्षले एक वर्षमा गरिएका कामको विवरण सार्वजनिक गरेका छन् ।
वडा कार्यालयमा पत्रकार सम्मेलन गरेर खडक नगरपालिका–५ का अध्यक्ष विजयकुमार साहले गत वर्षको खर्च विवरणका तथा आर्थिक वर्ष २०७५/०७६ को अनुमानित बजेटबारे पनि जानकारी दिए ।
उनले कामको विवरणबारे जानकारी मात्रै दिएनन्, अनुगमन गर्नसमेत पत्रकारहरुलाई आग्रह गरे । आर्थिक वर्ष २०७४/०७५ मा विभिन्न शीर्षकमा वडा नम्बर ५ मा एक करोड ६ लाख ९० हजार खर्च भएको जानकारी उनले दिए ।
चार दशकदेखि खोल्न नसकिएको खरचुइया कुशमहारदेखि पूर्व खत्वे टोलको बाटो सुचारु गरेकोमा उपस्थित गाउँलेले समेत वडा अध्यक्षको प्रशंसा गरे । साढे आठ लाख रुपैयाँ लागतको माटो ग्राभेल गरी पाँच सय मिटरको नयाँ बाटो खोलेपछि तीन किलोमिटर घुमेर जानु पर्ने खत्वे टोल अब पाँच मिनेटमै पुग्ने गरेको स्थानीय डोमनीदेबी मण्डलले बताइन् ।
कार्यक्रममा उपस्थित २ नम्बर प्रदेशसभाका सदस्य गोविन्द न्यौपानेले कमिशनतन्त्रको अन्त्य नभएसम्म विकास निर्माणले गति लिन नसक्ने भन्दै त्यसका लागि राजनीतिज्ञ, पत्रकार र बुद्धिजिवीसहित जिल्लाबासीले विद्रोह गर्नुपर्नेमा जोड दिए ।
त्यसैगरी अर्का प्रदेशसभा सदस्य रुवी कर्णले सबै जनप्रतिनिधिहरुले गर्ने हरेक काम खडक नगरपालिका–५ झैँ पारदर्शी बनेर भ्रष्टाचार अन्त्य गर्नुपर्नेमा जोड दिइन् ।
आर्थिक वर्ष २०७५/०७६ मा भौतिक पूर्वाधारतर्फ २४ लाख, कृषि विकासतर्फ पाँच लाख, महिलातर्फ तीन लाख, बालबालिकातर्फ दुई लाख ५० हजार, लक्षित समूहतर्फ दुई लाख ५० हजार र संस्थागत विकासतर्फ तीन लाखको अनुमानित बजेटठसमेत वडाअध्यक्ष साहले सार्वजनिक गरे ।
खत्वे टोल जाने नयाँ बाटो । तस्बिर: अन्नपूर्ण
प्रतिक्रिया दिनुहोस !
