लन्डन : रुस विश्वकप सकिएपछि युरोपेली क्लब फुटबलको सिजन सुरु हुनै लागेको छ । यद्यपि विश्वकप सकेर घर फर्किएका कतिपय खेलाडी अझै परिवार र साथीभाइसँग बिदा मनाइरहेका छन् भने केही खेलाडी भर्खरै आफ्नो क्लब फर्किएका छन् ।
विशेष गरी रुस विश्वकपको अन्तिम चरणको प्रतिस्पर्धामा सहभागी भएका देशका खेलाडीहरू अझै बिदामा छन् । रुस विश्वकपको ट्रफी लिएर घर फर्किएका फ्रान्सेली खेलाडीहरू अझै पनि बिदामा छन् । उनीहरूलाई क्लबले समेत केही समयका लागि छुट्टी दिएको छ । नयाँ सिजनको तयारीस्वरूप ‘प्री सिजन’ भ्रमणमा निस्किएको म्यानचेस्टर युनाइटेडले आफ्ना महŒवपूर्ण खेलाडी पल पोग्बालाई केही समयका लागि बिदा दिएको छ । यस्तै फ्रान्ससँग पराजित भएपछि उपविजेता बनेको क्रोएसियाका खेलाडीहरू पनि अझै केही समय छुट्टीमा हुनेछन् ।
आफ्नो टोली प्रतियोगिताको अघिल्लो चरणबाटै बाहिरिएपछि फुर्सदिला बनेका पोर्चुगिज कप्तान क्रिस्टियानो रोनाल्डोले यही समयको सदुपयोग गर्दै युभेन्टससँग अनुबन्धको नयाँ सम्झौता गरेका छन् । स्पेनिस ला लिगा क्लब रियल म्याड्रिडसँगको नौ वर्षको यात्रा टुंग्याउँदै रोनाल्डोले युभेन्टससँग आगामी चार वर्षको सम्झौता गरेका हुन् । युभेन्टस त्यो क्लब हो जहाँ अर्जेन्टिनी महान् फुटबलर डिएगो म्याराडोनाले पनि आफ्नो सक्रिय खेल जीवनको अन्तिम केही समय बिताएका थिए । रोनाल्डो नयाँ सिजनको तयारीका लागि यसअघि नै युभेन्टस पुगिसकेका छन् ।
आफ्नो टोली अर्जेन्टिना रुस विश्वकपको प्रिक्वार्टरफाइनलभन्दा माथि जान नसकेपछि घर फर्किएका लियोनल मेसी पनि आफ्नी श्रीमती एन्टोनेला रोक्कुजो र नानीहरूसँग बिदा मनाएर हालै मात्र बार्सिलोना फर्किएका छन् ।
ब्राजिलियन स्ट्राइकर नेमार हालै मात्र आफ्नो क्लब पेरिस सेन्ट जर्मन (पीएसजी) फर्किएका छन् । नयाँ सिजनका लागि पीएसजी छाडेर स्पेनिस क्लब रियल म्याड्रिड जाने चर्चा चलिरहेका बेला नेमारले यो सिजन आफू फ्रान्सेली राजधानीकै क्लबसँग रहने बताएका छन् । क्लब सिजन सुरु भएपछि खेलाडीहरू निरन्तर आफ्नो खेलमा केन्द्रित हुनुपर्ने भएकाले उनीहरू क्लब फर्कनुअघि केही समय आफ्नो परिवार र प्रेमिकासँग बिताउन चाहन्छन् ।
त्यसमा क्लबहरूले पनि खेलाडीको व्यस्ततालाई हेरेर बिदा दिने गर्छन् । घरेलु लिगसँगै युरोपेली क्लब प्रतियोगितामा टोली अघि बढ्दै जाँदा खेलाडीहरूले लामो समय आफ्नो परिवारका सदस्य भेट्न वा बिदा मनाउन पाउँदैनन् । त्यसैले पनि उनीहरूका लागि सिजन सुरु हुनुभन्दा अघिको यो समय परिवार र आफ्ना प्रियजनसँग रमाइलो गरी मनाउने अवसरका रूपमा समेत रहने गरेको छ ।
प्रतिक्रिया दिनुहोस !
