काठमाडौँ: सत्तारुढ दल नेपाल कम्युनिस्ट पार्टीका अध्यक्ष पुष्पकमल दाहाल प्रचण्डले आइतवार बाराको कलैयामा पुगेर हिन्दी भाषामा भाषण गरेका छन् । सम्बोधनको सुरुमा नेपालीमा बोलेका उनले बीचमा पुगेपछि हिन्दीमा सम्बोधन गरेका हुन्।
सम्बोधनका क्रममा दाहालले आफूले भोजपुरी भाषा बुझ्ने भए पनि उच्चारण गर्न नसक्ने भएकाले हिन्दीमा बोल्ने बताएका थिए । 'अगर आप को हिन्दी समझ्ने मेँ केही दिक्कन नहिँ हो तो मै हिन्दी मे बोल्ने को तयार हुँ', दाहालले यति भनेपछि हिन्दीमा भाषण सुरु गरे ।
कलैया उपमहानगरपालिकास्थित सडक शिलान्यास कार्यक्रममा सहभागी भएका स्थानीयबासीलाई हिन्दीमा सम्बोधन गर्दै प्रचण्डले नागरिकता समस्या, संविधान संशोधनदेखि तराई–मधेसको विकासबारे आफ्नो पार्टी र सरकारको धारणा राखे ।
शिलान्यास कार्यक्रममा प्रमुख अतिथिकारुपमा बोल्दै दाहालले मधेसमा सक्रिय राष्ट्रिय जनता पार्टी नेपाल र संघीय समाजवादी फोरम नेपाललाई आफ्नै पहलमा संविधान मान्ने अवस्थामा ल्याइपुर्याएको दाबी गरे ।
‘राजपा र फोरमलाई पनि संविधान मान्ने अवस्थामा आफैँले ल्याएको हो । मधेसी आदिवासी जनजाति सबैले लडाइँ नगरेको भए गणतन्त्र आउँदैनथियो’, उनले भने, ‘यो संविधानलाई हामीले कहिल्यै पूर्ण मानेका छैनौँ, यसलाई गतिशिल दस्तावेज मानेका छौँ । मधेसी जनताको उचित भावनालाई सम्बोधन गर्न प्रतिवद्ध छौँ ।’
संविधानमा सहमति
अध्यक्ष दाहालले संविधान संशोधनबारेमा प्रधानमन्त्री केपी ओली, आफू र फोरम उपेन्द्र यादवबीच एक राजनीतिक सहमति भएको पनि खुलासा गरे । ‘मधेसी जनताको माग संविधान संशोधन मार्फत् सम्बोधन गर्ने छौँ, त्यो तयारी भएको छ । हामीले त्यो सहमति पनि गरेका छौँ’, हिन्दीमा बोल्दै उनले भने, ‘यो संविधान मधेस, पहाड र हिमालको बनाउन परिमार्जन गरेर अघि बढ्न तयार छौँ ।’
संविधान संशोधनबारेमा अहिले पनि राजपासँग वार्ता चलिरहेको उनले खुलासा गरे । प्रचण्डले नेपालको संविधान अझै अपूर्ण रहेको बताउँदै यसलाई पूर्ण बनाउने तर्फ आफूहरुले कुनै कसर नछाड्ने पनि बताए ।
जन्मसिद्धका छोराछोरीलाई नागरिकता
अध्यक्ष दाहालले सडक शिलान्यास कार्यक्रममा बोल्दै जन्मसिद्ध नागरिकता लिएका बाबुआमाका छोराछोरीलाई नागरिकता दिन कुनै समस्या नरहेको पनि स्पष्ट पारे ।
‘नागरिकताको सवालमा प्रधानमन्त्री, म र गृहमन्त्री रामबहादुर थापा बसेर सहमति गरेका छौँ, नागरिकताको मुद्दा मुद्दा नै होइन’, दाहालले भने, ‘जन्मसिद्ध नेपाली नागरिक हो भने उसका सन्तानले नागरिकता नपाउनु आश्चर्यजनक हो । जन्मसिद्ध आधारमा बाबुआमाको नागरिकता छ भने छोराछोरीलाई पनि दिइन्छ ।’
जनयुद्धका क्रममा आफ्नै नेतृत्वमा मधेसका छोराछोरीले बलिदान गरेको बताउँदै त्यो बलिदानीलाई आफूले कुनै हालतमा खेर जान नदिने बताए । दाहालले बढ्दो चुरे दहन रोक्न पनि सरकारले पहल गरेर मधेसमा पानीको समस्या हुन नदिने जिकिर गरे ।
भिडियो हेर्नुहोस्
प्रतिक्रिया दिनुहोस !
