गौर : रौतहटको कटहरिया नगरपालिकामा जनप्रतिनिधि र कर्मचारीबीचको विवाद चुलिएपछि नगरपालिकाले दिने सेवा प्रभावित बनेको छ ।
काम गर्ने वातावरण नभएको भन्दै नगरपालिकाका कर्मचारीहरूले आइतबार कार्यालयमा जनप्रतिनिधिहरूको विरोध गर्दै तालाबन्दी गरेका छन् । साथै स्थानीय प्रशासनसँग सुरक्षाको मागसमेत गरेका छन् । गएको आर्थिक वर्षमा नगर क्षेत्रमा भएका विकास निर्माणलगायत विभिन्न शीर्षकमा भएको खर्च विवरण सार्वजनिक गर्न प्रमुख प्रशासकीय अधिकृत र लेखापालसँग जनप्रतिनिधिहरूले माग गर्दा विवरण सार्वजनिक नगरी कार्यालयमा आइतबार तालाबन्दी गर्नुपरेको जनप्रतिनिधिहरूले बताएका छन् ।
कटहरिया नगरपालिका प्रमुख प्रशासकीय अधिकृत रामलाल सहनीले आफू सर्लाहीबाट गौर गएकाले कार्यालयमा भएको घटनाबारे जानकारी नभएको बताए । उपमेयरका पत्नी नसरुद्दिन अन्सारी, उपमेयर, केही वडाध्यक्ष र नगरकार्यसमितिका पदाधिकारीविरुद्ध उजुरी गर्दै कर्मचारीहरू जिल्ला प्रशासन कार्यालय पुगेका हुन् । उपमेयर नुरजहाँ खातुनलगायत केही वडाध्यक्षले खर्च सार्वजनिक गर्न माग गरेका र लेखापाल राजेश्वरप्रसाद कुशवाह र प्रशासकीय अधिकृत रामलाल सहनीले अटेर गरेको आरोप छ ।
विभिन्न शीर्षकमा खर्च भएका रकम पारदर्शी नभएको र जनप्रतिनिधिहरूलाइ झुक्याएर हस्ताक्षर गराइरहेकोले त्यसको विरोध गरेको र खर्च सार्वजनिक गर्न माग गरेको कुनै कर्मचारीलाई धम्की नदिएको उपमेयर नुरजहाँ खातुनले बताएकी छन् । गत आवको खर्च अनुमोदन गर्न कर्मचारीले बैठकमा प्रस्ताव लगेको र जनप्रतिनिधिहरूले पहिले खर्च विवरण देखाउन माग गरेपछि विवाद सुरु भएको हो ।
काम गर्ने वातावरण नभएको र कर्मचारीहरूलाई धम्कीसमेत दिइएकाले तालबन्दी गर्नुपरेको कर्मचारीको भनाइ।
उक्त नगरपालिकाका मेयर सियाराम कुशवाह कारागारमा छन । हत्या आरोपमा मेयर कारागार रहेकाले नगरको कामसमेत प्रभावित हुँदै आएको स्थानीयले बताएका छन् । मेयर नहुँदा नगरपरिषद्समेत हुन सकेको छैन । कार्यालयमा काम गर्ने वातावरण नभएको र कर्मचारीहरूलाई धम्कीसमेत दिइने गरेकाले तालाबन्दी गरेर शान्ति सुरक्षा तथा न्यायको माग गर्दै प्रमुख जिल्ला अधिकारीलाइ ध्यानाकर्षण गराइएको कर्मचारीहरूले बताएका छन् ।
अनियमितता ढाकछोप गर्न कर्मचारीहरूले विभिन्न बहाना बनाएको केही नगरकार्यसमितिका पदाधिकारीहरू बताउँछन् ।
प्रजिअ गोविन्दप्रसाद रिजालले नगरपालिकामा विवाद भएको र उजुरी परेको बताएका छन् । उपमेयरका पत्नी आलमले कर्मचारीहरूलाई धम्की दिएको गुनासोसमेत कर्मचारीहरूले गरेका प्रजिअ रिजालले जानकारी दिए ।
प्रतिक्रिया दिनुहोस !
