खोलाले बगाएर युवतीको मृत्यु

दोलखा : उत्तरी दोलखाको कालिञ्चोक गाउँपालिका–६, लापिलाङमा खोलाले बगाएर एक युवतीको मृत्यु भएको छ ।कालिञ्चोक गाउँपालिका–६ लापिलाङको लेप्टुङ – ३४ वर्षीया विष्णुमाया खड्काको सोमबार बेलुका करिब साढे ४ बजे स्थानीय घट्टे खोलाले बगाएर मृत्यु भएको हो ।

गोठमा गाईभैँसीलाई घाँस हालेर फर्कदै गरेकी खड्कालाई खोलाले बगाएको जिल्ला प्रहरी कार्यालय  चरिकोटका प्रहरी निरीक्षक माधवप्रसाद काफ्लेले जानकारी दिए ।

 सोमबार बेलुका घटना भएको र गएराति ढिला मात्रै खबर प्राप्त भएकाले घटनास्थलमा मंगलबार बिहान मात्रै प्रहरी टोली पुगेको थियो । मृतक खड्काको शव घटनास्थलबाट डेढ मिटर तल खोलामा फेला परेको प्रहरीले जनाएको छ ।