चाबहिल–जोरपाटी सडक अनुगमन : ७२ करोड सकियो, सास्ती उस्तै
साउन २५, २०७५ शुक्रबार ६:४१:०
काठमाडौं : चाबहिल–जोरपाटी–साँखु सडकको बिहीबार भौतिक पूर्वाधार तथा यातायात मन्त्रीसहितको टोलीले स्थलगत अनुगमन गरेको छ । यो सडक निर्माण छिटो सक्न र २० दिनभित्रै सबै खाल्डा पुरी सहज रूपमा सवारी चल्नसक्ने बनाउन मन्त्री रघुवीर महासेठले सम्बन्धित निकायलाई निर्देशन दिएका छन् । पाँचवटा ठेकेदारले ७२ करोड रुपैयाँ खर्च गर्दा पनि सडकमा स्थानीयको सास्ती भने अझै उस्तै छ । तीन वर्षदेखिको सास्ती अझै कम नभएको यो सडकको निर्माण अवधि सकिँदासम्म न्यून प्रगति र सडक विस्तारमा सरकारी वेवास्ताका कारण यो सडकको यात्रा कष्टकर बनेको छ ।
चाबहिलदेखि जोरपाटी हुँदै साँखुसम्म पुग्ने यो सडकको दूरी जम्मा १२ दशमल ४ किलोमिटर मात्रै छ । दुईदेखि साढे दुई वर्ष अगाडि नै निर्माण सम्पन्न गर्ने गरी पाँचवटा प्याकेज बनाएर लागेको ठेक्का निर्माण समय सकिँदासम्म जम्मा ३१ प्रतिशत भौतिक प्रगति भएको छ । कुल ठेक्का रकमको ४२ प्रतिशतमात्र खर्च भएको छ ।
काठमाडौं उपत्यका सडक विस्तार आयोजनाले छिटो काम सक्न पाँचवटा प्याकेजमा ठेक्का लगाएको भए पनि निर्धारित समयमा सन्तोषजनक प्रगति भएको छैन । त्यसैले आयोजनाले चालु आवदेखि एक वर्षको समय थप गरेको छ । यो सडकको पाँचवटा प्योकजमध्ये चारवटाको समय गत असारमै सकिएको छ । निर्माण अवधिमा आधा पनि काम नहुनु, स्थानीयको संगठित विरोध, अदालतको आदेशले निर्माणमा रोकिनुलगायत कारण बाध्य भएर एक वर्षको समय थपिएको आयोजनका प्रवक्ता विश्व विजयलाल श्रेष्ठले बिहीबार अन्नपूर्णसँग बताए ।
उनले भने, ‘यो सडकको भौतिक प्रगति न्यून देखिएको छ । १५ देखि ४० प्रतिशसम्म मात्रै प्रगति भएको यी सडकको औसतमा ३१ प्रतिशत प्रगति भएको छ । आयोजनाले एक अर्ब ७३ करोड ५४ हजार रुपैयाँमा ठेक्का लगाएको यो सडकमा हालसम्म ७२ करोड ७० लाख रुपैयाँ खर्च भइसकेको छ ।
आयोजनाले सडकको राइट अफ वे क्लियर नभएको (सडक किनारका अवरोध नहटेको), सडक विस्तार गर्दा १ देखि २ मिटरसम्म भत्काउनुपर्ने घर तथा पेटी स्थानीयले भत्काउन नदिएको, ढल, बिजुलीको पोल, अदालतको आदेश, रुखलगायत अवरोध नहटेकाले सडक विस्तार गर्न नसकिएको स्वीकार गरेको छ । यो क्षेत्रमा पाँचवटा ठेकेदारले काम गरिरहेको भए पनि पानी पर्दा हिलो, घाम लाग्दा घुलो र सवारी चाप हुँदा जाम हुने समस्या भने जस्ताको तस्तै छ । ००००० राति नै पुरियो खाल्डो
मन्त्रीको अनुगमन हुने थाहा पाएर बुधबार राति नै ठेकेदारले माटोले खाल्डा पुरेका थिए । बिहीबार पानी नपरेकाले बाटो सहजै हिड्न सक्ने मात्रै भएको मन्त्रीसँग स्थानीयले गुनासो गरेका छन् । बाटोको वास्तविक अवस्थामा थाहा पाउन पानी परेको दिन अनुगमनमा आउन स्थानीयले मन्त्रीसँग अनुरोध गरेका छन् ।
मन्त्री महासेठले यो बाटोमा स्थानीयले भोगेको समस्या समाधान हुने र अब जति साइट क्लियर छ त्यति नै ठाउँमा कालोपत्रे गरिने जानकारी दिए । मन्त्री महासेठका अनुसार सरकारले चाबहिलदेखि जोरपाटी हुँदै साँखुसम्मको सडक र नागढुंगा कलंकी सडकलाई यथास्थितिमै कालोपत्रे गर्न सरकारले निर्देशन दिएको छ । अब, ठेकेदार कम्पनीले जहाँ जति साइट क्लियर छ, ती ठाउँमा राम्रोसँग काम गरेर स्थानीयले भोग्दै आएको खाल्डाखुल्डी र धुवाधुलोको सास्तीबाट मुक्ति दिने बताए ।
मन्त्रीको टोलिसँगै अनुमनमा गएका पूर्वप्रधानमन्त्री माधवकुमार नेपालले पनि आगामी १५ दिनभित्रै यो सडकमा खाल्डाखुल्डी नदेखिने गरी काम गर्न ठेकेदार कम्पनीलाई निर्देशन दिए । नेपालले १५ दिनपछि फेरि यो सडकको अवस्था र पछिल्लो प्रगतिको अनुगमन हुने पनि बताए । स्थानीयले भने यो सडक महानगरभित्र भएर पनि महानर भएको र राजमार्ग नभएर कालमार्ग भएका प्रतिक्रिया दिएका छन् । ठेकेदार कम्पनीले भने साइट क्लियर नभएको र स्थानीयको विरोध भएर काम गर्न नपाएको दाबी गरेका छन् । यो सडक विस्तारमा कुनै अवरोध नआउने हो भने तीन महिनामा सडक पूरै कालोपत्रे हुने दाबी ठेकेदार कम्पनीको छ ।
प्रतिक्रिया दिनुहोस !
