बेंसीसहर : निरन्तरको बाढी र पहिरोले मनाङ जाने एक मात्र बेंसीसहर–चामे सडक अवरुद्ध बनेपछि नेपाली सेनाले वैकल्पिक बाटो निर्माण गरेको छ । मनाङमा रहेको रणदल गुल्मका सेनानी दिलीप घलेको नेतृत्वमा ३५ जनाको टोलीले उक्त बाटो निर्माण गरेको हो । घलेले मस्र्याङ्दीको कटानले सडक बगाएपछि स्थानीयलाई आवतजावतमा कठिनाइ भएकाले बाटो निर्माण गरिएको बताए । सेनाले स्थानीयको समस्यालाई मध्यनजर गर्दै ५ सय मिटर सडक निर्माण गरेको हो । पहिरो गएको सडकभन्दा २ सय मिटर माथि वैकल्पिक बाटो निर्माण गरिएको घलेले जानकारी दिए ।
पहिरोले बगाएपछि ५ दिनदेखि उक्त सडक बन्द भएको चामे गाउँपालिकाका प्रमुख लोकेन्द्र घलेले बताए । उनका अनुसार दुई वटा जेसीभीले मस्र्याङ्दीको कटान पन्छाउनुका साथै ढुंगा हटाउने काम थालिएको छ । जतिसक्दो चाँडो सडक खुलाउने तयारीमा जनप्रतिनिधि, स्थानीय प्रशासन, प्रहरी र सेना लागिपरेको घलेले बताए । करिब डेढ सय मिटर सडक बगाएको पहिरोले त्रिचुङाल्डाका १२ घर उच्च जोखिममा छ । नजिकै पहिरो गएकाले कोतो गाउँसमेत जोखिममा परेको घलेले बताए ।
पहिरोले बाटो अवरुद्ध बनेपछि कोतो क्षेत्रबाट विद्यार्थी पढ्न आउन नसकेका चामेस्थित लोकप्रिय माविका प्रधानाध्यापक सुरेशकुमार थापाले बताए । जिल्ला प्रहरी कार्यालय मनाङका प्रहरी नायव उपरीक्षक खड्काबहादुर खत्रीका अनुसार सडक खुलाउन कम्तीमा एक साता लाग्ने छ । पहिरोले सडक बगाएपछि यात्रुहरू मर्कामा परेका छन् । बेंसीसहर–चामे सडकमा खसेको पहिरो र बाढीले स्थानीयलाई मात्रै नभएर चक्रीय अन्नपूर्ण पदमार्गमा आउने पर्यटकसमेतलाई समस्यामा पारेको छ ।
प्रतिक्रिया दिनुहोस !
