काठमाडौँ: इन्डोनेसियामा जारी १८औं एसियाली खेलकुद प्रतियोगिता (एसियाड) फुटबल अन्तर्गत समूह चरणको अन्तिम खेलमा पनि नेपाल पराजित भएको छ। जापान र भियतनामसँग पराजित हुँदै यसअघि नै समूह चरणबाट बाहिरिए नेपाल पाकिस्तानसँग पनि पराजित भएको हो ।
आत्मघाती गोल उपहार पाएर अग्रता बनाएको नेपालले अन्तिममा लय गुमाउँदा २-१ ले पराजित हुन बाध्य भएको हो । पछाडि परेको अवस्था उल्ट्उने क्रममा पाकिस्तानका लागि खेलको ५५ औँ मिनेटमा मुहम्मद बिलाल र ७२ औँ मिनेटमा सदम हुसैनले निर्णायक गोल गरे ।
त्यसअघि नेपालले खेलको १२ औँ मिनेटमा पाकिस्तानका खेलाडी युनस साहबजको गोलमा नेपालले अग्रता बनाएको थियो । योसँगै नेपालले आफ्नो समूहका सबै तीनै खेलमा पराजित हुँदै घरको यात्रा तय गरेको हो ।
यसअघि समूह चरणको पहिलो खेलमा बलियो टोली जापानलाई कडा टक्कर दिएको नेपालले १-० को हार भोगेको थियो । समूह चरणको दोस्रो खेलमा नेपाल भियतनामसँग २-० गोलले पराजित भएको थियो । त्यससँगै नेपाल अन्तिम खेल अगावै प्रतियोगिताबाट बाहिरिएको थियो ।
एसियन गेम्सअन्तर्गत पुरुष फुटबलको समूह डि मा नेपालसहित जापान, भियतनाम र पाकिस्तानसँग रहेका थिए। पाकिस्तानले जित निकाले पनि यो समूहबाट शीर्ष दुई टोली जापान र भियतनाम अघिल्लो चरणमा पुगेका छन् ।
नेपाली टोली तीन महिना लामो घरेलु तयारी गरेर थाइल्यान्ड हुँदै एसियाडमा सहभागी हुन इन्डोनेसिया पुगेको थियो । नेपालले थाइल्यान्डमा दुईवटा मैत्रीपूर्ण अभ्यास खेल खेलेको थियो । नेपाल दुईवटै अभ्यास खेलमा पनि पराजित भएको थियो ।
प्रतिक्रिया दिनुहोस !
