हडर्सफिल्डविरुद्ध म्यानचेस्टर सिटीको गोलबर्षा, एग्वेरोको ह्याट्रिक

काठमाडौँ : इङ्लिस प्रिमियर लिगमा यो सिजन पनि म्यानचेस्टर सिटीले आफ्नो रवाफिलो प्रदर्शन जारी राखेको छ । 

घरेलु इत्तिहाद स्टेडियममा भएको प्रिमियर लिगको आफ्नो दोस्रो खेलमा सिटीले हडर्सफिल्डमाथि ६–१ को फराकिलो जित दर्ता गराएको हो । सिटीको जितमा अर्जेन्टाइन स्ट्राइकर सर्जियो एग्वेरोले ह्याट्रिक गरे । 

उनले खेलको पहिलो हाफमा २ र दोस्रो हाफमा १ गोल गरे । अग्वेरोले २५ औँ मिनेटमा खाता खोले भने ३५ औँ मिनेटमा दोस्रो गोल गरे । त्यसपछि खेलको ७५ औँ मिनेटमा गोल गर्दै उनले ह्याट्रिक गर्न सफल भए ।

सिटीका लागि अर्का स्ट्राइकर ग्याब्रियल जेसुसले खेलेको ३१ औँ मिनेटमा गोल गरे । त्यसैगरी डेभिड सिल्भाले ४८ औँ मिनेटमा गोल थपे । सिटीका लागि हडर्सफिल्डका कोङ्गोलोले आत्मघाती गोल उपहार दिएपछि अग्रता झन् फराकिलो भयो । 

हडर्सफिल्लडका लागि एकमात्र सान्तवना गोल स्टानकोभिकले खेलको ४३ औँ मिनेटमा गरेका थिए । सिटीले यो सिजनको पहिलो खेलमा आर्सनललाई २–० ले पराजित गर्दै उपाधि रक्षा अभियान थालेको थियो ।