काठमाडौं : एसिया कप छनोट प्रतियोगिताको तयारीका लागि नेपाली राष्ट्रिय क्रिकेट टोली सोमबार श्रीलंका पुगेको छ । मलेसियामा यही अगस्ट २९ देखि सेप्टेम्बर ६ सम्म हुने छनोट प्रतियोगिताको तयारीस्वरूप नेपाली टोली श्रीलंका गएको हो । नेपालले श्रीलंकामा तीन अभ्यास खेलसहित एसिया कप छनोट प्रतियोगिताका लागि सात दिन तयारी गर्नेछ ।
नेपालले अगस्ट २२ मा आर्मी क्रिकेट क्लब, २४ तारिखमा ब्लोमफिल्ड र २६ तारिखमा कोल्ट्सविरुद्ध अभ्यास खेल खेल्नेछ । त्यसपछि नेपाली टोली छनोट प्रतियोगितामा सहभागी हुन अगस्ट २७ मा श्रीलंकाबाटै मलेसियातर्फ लाग्नेछ । भारत र पाकिस्तानको सिनियर राष्ट्रिय टोलीसँग प्रतिस्पर्धा गर्न पाउने प्रतियोगितासम्म पुग्ने बाटोको रूपमा रहेको यो छनोट प्रतियोगितालाई नेपाली टोलीले महŒवपूर्ण मानेको छ । ६ टोली सहभागी रहने छनोट प्रतियोगिताको विजेता एक टोली सेप्टेम्बर १५ देखि ३० सम्म संयुक्त अरब इमिरेट्स (यूएई)मा हुने एसिया कपमा भारत र पाकिस्तान रहेको समूह ‘ए’मा पर्नेछ ।
भारत र पाकिस्तानले एसियाली क्षेत्रमा आयोजना हुने प्रतियोगितामध्ये एसिया कपमा मात्रै सिनियर राष्ट्रिय टोली पठाउने भएकाले नेपालले यो अवसरलाई महŒवका साथ लिएको हो । राष्ट्रिय टोलीका १५ खेलाडीमध्ये १४ खेलाडी सोमबार श्रीलंका पुगेका हुन् । कप्तान पारस खड्का, उपकप्तान ज्ञानेन्द्र मल्लसहित अनिलकुमार शाह, वसन्त रेग्मी, विनोद भण्डारी, दीपेन्द्रसिंह ऐरी, करण केसी, ललित भण्डारी, ललितनारायण राजवंशी, आरिफ सेख, रोहितकुमार पौडेल, सागर पुन, सोमपाल कामी र सुवास खकुरेल श्रीलंका पुगेका हुन् ।
हाल क्यारेबियन प्रिमियर लिग (सीपीएल) खेल्न वेस्ट इन्डिजमा रहेका सन्दीप लामिछाने भने उतैबाट प्रतियोगिता खेल्न मलेसिया आइपुग्ने छन् । सन्दीप सीपीएलमा आफ्नो टोलीका बाँकी खेलहरू छाडेर अगस्ट २८ मा मलेसिया आइपुग्ने छन् ।
श्रीलंका प्रस्थान गर्नुअघि नेपाली टोलीलाई सोमबार नै सभामुख कृष्णबहादुर महराले बिदाइ गरे । नेपाली टोलीको मुख्य प्रशिक्षकमा जगत टमाटा छन् भने भारतीय अपुर्भ देसाई ब्याटिङ परामर्शदाता प्रशिक्षक र रमण शिवाकोटी व्यवस्थापकको भूमिकामा छन् । उनीहरूसँगै फिजियो दिनेश भट्ट, ट्रेनर सुवास पाट्रो र भिडियो एनालिस्टका रूपमा सुरज शाक्य पनि टोलीसँगै श्रीलंका गएका हुन् ।
प्रतिक्रिया दिनुहोस !
