कालिकोट : जिल्ला कारागार कार्यालय कालिकोटमा क्षमताभन्दा तेब्बर कैदीबन्दी छन् । जिल्ला प्रशासन कार्यालयको अनुगमनमा कारागारमा क्षमताभन्दा तेब्बर कैदीबन्दी रहेको पाइएको हो ।
कालिकोटका प्रमुख जिल्ला अधिकारी चन्द्रबहादुर कार्कीका अनुसार १५ जनाको क्षमता रहेको जिल्ला कारागारमा ४६ जना पुरुष र ७ जना महिला छन् । कुल १५ जनाको क्षमता रहेको जिल्ला कारागारमा ५३ जना कैदीबन्दी बस्नुपरेको छ । उनले भने, ‘महिला कारागारमा त ७ जना मात्र महिला भएकाले सहज नै छ तर पुरुष ४६ जना बन्दी रहेकाले उनीहरू दुई वटा कोठामा खचाखच भएर बस्ने गरेका छन् ।
प्रमुख जिल्ला अधिकारी कार्कीले जिल्ला कारागारको व्यवस्थापकीय पक्ष राम्रै भए पनि कैदीले एकै भान्छामा सामूहिक खानपान गरिरहेको बताए । उनले भने, ‘सबै कैदीबन्दी एकै भान्छामा मेस चलाएर खाना खान्छन् ।’ कारागारमा टेलिफोन सेवा र खेलकुदका लागि भलिबल अपलब्ध छ । प्रमुख जिल्ला अधिकारी कार्कीले जिल्ला कारगारका कैदीले सीप सिकेर आयआर्जन गरिरहेको बताए । उनले भने, ‘टोपी, स्विटर, पन्जालगायत कपडा बुनेर आयआर्जन गर्छन् । उनीहरूले नियमित डाक्टरको व्यवस्था गरिदिन माग गरेका छन् ।’ कोठामा भएको धुलो हावाले भान्छामा लैजाने र कैदीलाई पत्थरीको समस्या हुने गरेको उनीहरूले बताए ।
जिल्ला प्रहरी प्रमुख डीएसपी विनोद शर्माले कालिकोटको जिल्ला कारागार कार्यालयलाई कर्णाली प्रदेशकै नमुना कारागारका रूपमा विकास गर्न पहल सुरु गरिएको जानकारी दिए । उनले आफूहरूको अनुगमन क्रममा कैदीबन्दीले ८ बुँदे मागसमेत राखेको बताउँदै ती माग सम्बोधन गर्न पहल भइसकेको बताए ।
प्रतिक्रिया दिनुहोस !
