बालिका हत्या प्रकरण: कञ्चनपुरका सिडिओ मन्त्राालय तानिए

कञ्चनपुर: गृहमन्त्रालयले कञ्चनपुरका प्रमुख जिल्ला अधिकारीसहित तीन सुरक्षा अधिकृतलाई मन्त्रालयमा तानेको छ । 

साउन १० गते १३ वर्षीया बालिका निर्मला पन्तको बलात्कारपछि भएको हत्याको घटना अनुुसन्धानमा चुकेपछि प्रजिअ कुमार खड्का, प्रहरी उपरीक्षक डिल्लीराज विस्ट र प्रहरी नायब उपरीक्षक ज्ञानबहादुर सेट्टीलाई काठमाडौँ फिर्ता बोलाइएको हो । 

प्रहरी प्रधान कार्यालयले बुधबार मात्रै प्रहरी वरिष्ठ उपरीक्षक विक्रमबहादुर चन्दलाई कञ्चनपुरमा खटाइसकेको छ। चन्द कञ्चनपुर पुगेलगत्तै सुरक्षानिकायका तीनै अधिकारीलाई मन्त्रालय तानिएको हो । 

बालिका हत्या प्रकरणमा मानसिक सन्तुलन नभएका ४१ वर्षीय दिलीपसिंह विस्टलाई पक्राउ गरेपछि चार दिनदेखि कञ्चनपुर अशान्त छ । स्थानीयले वास्तविक अपराधी लुकाउन मानसिक सन्तुलन ठीक नभएको मानिसलाई पक्राउ गरी घटना ढाकछोप गर्न खोजेको भन्दै आन्दोलन चर्काइरहेका छन् । 

आन्दोलनकै क्रममा बिहीबार जिल्ला प्रशासन कार्यालय नजिक प्रहरीले हानेको गोली लागेर ६ जना घाइते भएका छन् । प्रदर्शन उग्र भएपछि प्रशासनले भीमदत्त नगरपालिका क्षेत्रमा कर्फ्यू जारी गरेको छ ।