निर्मला हत्या प्रकरण : प्रदर्शनकारीमाथि गोलीप्रहार, ६ जना घाइते

महेन्द्रनगर : निर्मला हत्याविरुद्ध जारी आन्दोलन बिहीबार उग्र भएपछि नियन्त्रण गर्न प्रहरीले गोली प्रहार गर्दा महेन्द्रनगरमा ६ जना प्रदर्शनकारी घाइते भएका छन् । घाइतेमध्ये २ जना सिकिस्त छन् । गोली प्रहारपछि स्थानीय प्रशासनले बिहीबार साँझ कफ्र्यू लगाएको छ । जिल्ला सुरक्षा समितिको बैठकले बिहीबार बेलुकी ५ बजेदेखि शुक्रबार बिहान ५ बजेसम्म कफ्र्यू लगाउने निर्णय गरेको कञ्चनपुरका प्रजिअ कुमारबहादुर खड्काले जानकारी दिए ।

जिल्ला प्रहरी कार्यालय कञ्चनपुरका डीएसपी ज्ञानबहादुर सेटीले प्रहरीको गोली लागेर ६ जना प्रदर्शनकारी घाइते भएको जानकारी दिए । प्रदर्शनकारीले ढुंगामुढा गरेपछि अ श्रुग्यास प्रहार गर्दासमेत स्थिति नियन्त्रण गर्न नसकेर गोली चलाइएको दाबी प्रहरीले गरेको छ । उनका अनुसार प्रदर्शनकारीहरूले हानेको ढुंगा लागेर ४ जना प्रहरीसमेत घाइते भएका छन् । तर प्रहरीले कति राउन्ड गोली चल्यो खुलाएको छैन ।

प्रहरीको गोली लागेर १७ बर्से अर्जुन भण्डारा, ४२ बर्से तेज भट्ट, २० बर्से तीर्थ पनेरु, मनोज बुढा, सरोज खड्का र कैलालीको हसुलियाका सन्तोष कडरिया घाइते भएका छन् । घाइतेमध्ये भीमदत्त नगरपालिका–१८ का भण्डारा र भट्ट सिकिस्त छन् । भण्डाराउनको दायाँ खुट्टामा घुँडाछेउ गोली लागेको छ । महाकाली अञ्चल अस्पतालमा उपचार हुन नसकेपछि धनगढीस्थित सेती अञ्चल अस्पताल ल्याइएका उनलाई काठमाडौं रेफर गरिएको छ । भट्टको अवस्था पनि गम्भीर रहेकाले उनलाई उपचारका लागि कोहलपुर मेडिकल कलेज लगिएको छ ।

प्रदर्शनकारीले गरेको ढुंगामुढाबाट प्रहरी हवलदार हर्कबहादुर पाल, प्रहरी जवान महेश भट्टसहित चार प्रहरी घाइते भएको जिल्ला प्रहरी कार्यालय कञ्चनपुरले जनाएको छ । बिहीबार दिनभरि भएको प्रदर्शनमा प्रहरी र प्रदर्शनकारी गरी दर्जनौं घाइते भएका छन् । बिहीबारको आन्दोलन जिल्ला प्रशासन कार्यालय परिसरनजिक, जिल्ला प्रहरी कार्यालय परिसर र भीमदत्त नगरपालिका परिसरमा बढी उग्र बनेको हो । प्रहरीले स्थिति नियन्त्रणमा लिन सयौं राउन्ड अ श्रुग्यास प्रहार गरेको थियो । अ श्रुग्यास प्रहार गर्दा पनि प्रदर्शनकारी तितरबितर नभएपछि प्रहरीले गोली प्रहार गरेको स्थानीयले बताएका छन् ।

प्रहरीले मानसिक सन्तुलन नभएका स्थानीय दिलीपसिंह विष्टलाई बलात्कार र हत्याको अभियोगमा पक्राउ गरी सार्वजनिक गरेपछि मंगलबारदेखि चर्केको आन्दोलन बिहीबार उग्र बनेको हो । प्रदर्शनकारीले बिहानैदेखि ठाउँ ठाउँमा टायर बालेर प्रदर्शन गरेका थिए । महेन्द्रनगर बजार बन्द रहे भने शिक्षण संस्था र यातायातसमेत बिहानैदेखि ठप्प थियो । वास्तविक बलात्कारी पक्राउ गरी कारवाही गर्नुपर्ने, शान्ति सुरक्षाको ग्यारेन्टी गर्नुपर्ने, कञ्चनपुरका एसपीमाथि कारवाही हुनुपर्नेलगायत माग राख्दै बिहीबार बिहानैदेखि प्रदर्शन सुरु भएको थियो ।

साउन १० गते घरबाट होमवर्क गर्न साथी रोशनी बमको घर गएकी १३ वर्षीया निर्मला पन्तको बलात्कारपछि हत्या गरिएको अवस्थामा साउन ११ गते उखुबारीमा शव फेला परेको थियो ।

कर्फ्यू उल्लंघन

स्थानीय प्रशासनले बिहीबार बेलुकी जारी गरेको कर्फ्यू प्रदर्शनकारीले उल्लंघन गर्दै भीमदत्त नगरपालिकाको कार्यालयमा आगजनीको प्रयास गरेका छन् । उनीहरूले ढुंगामुढा गर्दै नगरपालिकामा आगजनीको प्रयास गरे पनि प्रहरीले अ श्रुग्यास प्रहार गरी तितरबितर पारेको जिल्ला प्रहरी कार्यालयले जनाएको छ ।

प्रशासनले पूर्वमा भीमदत्त नगरपालिकाको भाँसीदेखि कारागार पछाडिको नहर हँुदै मदनभण्डारी स्कुलसम्म, पश्चिममा वनगाउँ क्षेत्रदेखि निंगलासैन स्कुलसम्म, उत्तरमा जनज्योति चोकदेखि उत्तर नहरबाट खैरेनी चोक नहर हुँदै त्रिपुरा युवा क्लबको कार्यालयसम्म र दक्षिणमा मदन भण्डारी स्कुुलदेखि सीप विकास तालिम केन्द्रको नहर हुँदै निंगलासैन स्कुलसम्म कर्फ्यू जारी गरेको हो ।

सहसचिवको नेतृत्वमा छानबिन समिति

आन्दोलन चर्किएपछि गृह मन्त्रालयले निर्मला हत्याको छानबिन गर्न कारागार व्यवस्था विभागका महानिर्देशक सहसचिव हरिप्रसाद मैनालीको नेतृत्वमा ५ सदस्यीय छानबिन समिति गठन गरेको छ ।

समितिमा तीन वटै सुरक्षा निकायका डीआईजी र प्रदेश ७ को आन्तरिक तथा कानुन मन्त्रालयका एक जना प्रतिनिधि रहने छन् । नेपाल प्रहरीका डीआईजी रामप्रसाद श्रेष्ठ, सशस्त्र प्रहरीका डीआईजी बसन्त बानिया, राष्ट्रिय अनुसन्धान विभागका निर्देशक लक्ष्मण गुरुङ र प्रदेशको आन्तरिक मामिला तथा कानुन मन्त्रालयका सहसचिव वीरेन्द्र केसीलाई छानबिन समितिको सदस्य तोकिएको छ । गृह मन्त्रालयले समितिलाई १५ दिनभित्र घटनाको प्रतिवेदन बुझाउन निर्देशन दिएको छ ।

फेरिए सीडीओ र एसपी

शान्ति सुरक्षा कायम गर्न नसकेको भन्दै गृह मन्त्रालयले कञ्चनपुरका प्रजिअ कुमार खड्का, एसपी डिल्लीराज विष्ट र डीएसपी ज्ञानबहादुर सेटीलाई मन्त्रालयमा फिर्ता बोलाएको छ । मन्त्रालयले प्रजिअ खड्काको ठाउँमा तारानाथ अधिकारीलाई र एसपी विष्टको ठाउँमा कुबेर कठायतलाई पठाएको छ ।

आन्दोलन चर्किएपछि प्रदेश ७ का नेकपाका सांसदले गृहमन्त्री रामबहादुर थापासँग भेटी घटनालाई गम्भीर रूपमा लिन र आवश्यक कदम चाल्न आग्रह गरेका थिए । सांसद एवं नेकपा नेता लेखराज भट्ट नेतृत्वको टोलीले गृहमन्त्रीसँग भेटेको कञ्चनपुर क्षेत्र ३ का सांसद डा.दीपकप्रकाश भट्टले जानकारी दिए ।

संयमीत हुन प्रदेश सरकारको आग्रह

प्रदेश मन्त्रिपरिषद्को बिहीबारको बैठकपछि प्रदेश सरकारले कञ्चनपुरवासीसँग संयमित हुन आग्रह गरेको छ । बैठकपछि प्रदेश सरकारका प्रवक्ता तथा आन्तरिक मामिला तथा कानुनमन्त्री प्रकाशबहादुर शाहले पत्रकार सम्मेलनमा प्रदेश सरकारले निर्मला हत्याकाण्डको विश्वसनीय छानबिन गर्न प्रधानमन्त्री र गृहमन्त्रीसँग आग्रह गरेको जानकारी दिएका थिए।