कञ्चनपुर अपडेट : नयाँ सिडिओ र एसपी पुगेलगत्तै मारिए किशोर
भदौ ८, २०७५ शुक्रबार १८:५३:०
कञ्चनपुर : शुक्रबार दिनभर शान्त रहेको महेन्द्रनगर बजारमा साँझ एक्कासी आन्दोलन चर्किँदा एकजना किशोले ज्यान गुमाएका छन् । नगरपालिका क्षेत्रमै प्रहरीको गोली लागेर भीमदत्त नगरपालिका-१८ भगतपुर बस्ने १७ वर्षीय सन्नी खुनारको ज्यान गएको छ । खुनारको पेटमा गोली लागेर अस्पताल लगिएपछि ज्यान गएको हो ।
अस्पताल लगिएपछि उनको मृत्यु भएपछि शवलाई प्रदर्शनकारीले जिल्ला प्रशासन कार्यालय अगाडि लगेर राखिदिएका छन् । बिहीबार भएको प्रदर्शन हिंसात्मक हुँदा प्रहरीले चलाएको गोली लागेर ६ जना घाइते भएका थिए । त्यसपछि सरकारले कञ्चनपुरका प्रजिअ, एसपी र डीएसपीलाई फिर्ता बोलाएर उनीहरुको स्थानमा काठमाडौँबाट पठाएको थियो ।
काठमाडौँबाट प्रजिअका रुपमा तारानाथ अधिकारी र एसपीकारुपमा कुबेर कडायत पुगेलगत्तै प्रहरीको गोलीबाट किशोर मारिएका हुन् । प्रहरीको गोली लागेर अर्का युवक चेतन भट्ट घाइते भएका छन् । उनको खुट्टामा गोली लागेको छ । यो घटनामा कम्तिमा पनि १७ जना घाइते भएका छन् ।
मेयरको घर तोडफोड
यसैबीच प्रदर्शनकारीले भीमदत्त नगरपालिकाका मेयर सुरेन्द्र विष्टको घर पनि तोडफोड गरेका छन् । प्रदर्शनले हिंसात्मक रुप लिएपछि मेयरको घरमा आगोसमेत लगाउन खोजिएको थियो । तर तत्कालै प्रहरी पुगेपछि घरमा आगो लगाउन दिए । प्रदर्शनकारीले विष्टको घरमा भने तोडफोड गरेका छन् ।
ट्राफिक र नगरपालिकामा पनि तोडफोड
प्रदर्शनकारीहरुले भीमदत्त नगरपालिकास्थित जिल्ला ट्राफिक कार्यालयमा तोडफोड गरेका छन् । त्यसैगरी भीमदत्त नगरपालिकाको कार्यालयमा पनि तोडफोड भएको छ ।
नगरपालिका र मेयरको घर तोडफोड भएपछि प्रहरी अवस्था नियन्त्रण बाहिर गएको निचोडसहित गोली चलाएको हो । प्रदर्शनकारीले ढुंगामुडा गरेर अवस्था नियन्त्रण बाहिर लाने प्रयास गरेपछि गोली चलाउन बाध्य भएको जिल्लास्थित एक सुरक्षा अधिकारीले जानकारी दिएका छन् ।
आन्दोलनमा घुसपैठ ?
स्थानीय प्रशासनले शुक्रबार अचानक आन्दोलन उठ्नुमा घुसपैठ भएको आशंका गरेको छ । जिल्लाको कमाण्ड सम्हाल्न नयाँ सीडीओ र एसपी आएको अवस्थामा अचानक आन्दोलन उठेर घटना भएपछि स्थानीय सुरक्षा अधिकारीले यस्तो आशंका गरेका हुन् ।
अर्कातिर सरकाले गठन गरेको उच्चस्तरीय छानबिन समितिले काम गर्न नपाउँदै रक्तपातपूर्ण भिडन्त भएको हो । प्रहरीको गोलीले किशोरको ज्यान गएपछि महेन्द्रनगर क्षेत्र अहिले तनावग्रस्त छ ।
प्रतिक्रिया दिनुहोस !
