धनगढी : धनगढी उपमहानगरपालिकाका केही वडामा मनपरी तवरले वर्षायाममा ग्राभेल भएको छ । उपमहानगरपालिका–२ अन्तर्गतका पक्की सडकमा परेका खाल्डाखुल्डी अहिले पुरिएका छन् ।
बर्सातअघि नै खाल्डाखुल्डी पुर्न ध्यान नदिएको वडा कार्यालयले ३० प्रतिशत बढी महँगोमा ग्राभेल किनेर सडकमा खाल्डाखुल्डी भरेको छ । नदीजन्य पदार्थ उठाउन असार १ गतेदेखि भदौ मसान्तसम्म बन्द गरिएको छ । यो समयमा निर्माण व्यवसायीले स्टकमा रहेका नदीजन्य सामग्री महँगोमा बिक्री गर्ने गरेका छन् ।
वैशाख र जेठमा प्रतिघनमिटर ६ सय रुपैयाँमा पाइने ग्राभेल सामग्री अहिले ९ सय रुपैयाँमा किनेर पक्की सडकका खाडल पुरिन थालिएका हुन् । प्रतिघनमिटर नौ सय रुपैयाँमा ग्राभेल किनेर खाल्डाखुल्डी भरेको वडाध्यक्ष नरबहादुर बमले स्विकारे ।
उनले सडकमा खाल्डाखुल्डी भएपछि जनताले माग गरेको र महँगोमा भए पनि सडकमा ग्राभेल हालेको बताए । उद्यपि, यसअघि भने उक्त सडक एडीबीको ऋण सहयोगमा नेपाल सरकारले सञ्चालन गरेको क्षेत्रीय सहरी विकास आयोजनाअन्तर्गत परेको भन्दै कुनै पनि मर्मत कार्य अगाडि बढाइएको थिएन ।
वडा कार्यालयले ट्राफिक चौराहदेखि जिल्ला शिक्षा कार्यालय हुँदै सन्तोषी टोलको चर्चसम्म ग्राभेल गरेको छ । त्यस्तै, तिल्केताल, एभरेष्ट स्कुल क्षेत्रमा पनि ग्राभेल गरिएको छ । कार्यालयले अहिलेसम्म ६४ ट्र्याक्टर ट्राली ग्राभेल हालेको जनाएको छ । वडा कार्यालयले प्रतिट्रली ३ हजार ६ सय रुपैयाँका दरले २ लाख ३० हजार ४ सय बजेट खर्च गरेको छ ।
यति नै ग्राभेल जेठ मसान्तसम्म गरेको भए एक लाख ६० हजार ४ सय बजेटमै सम्पन्न हुने स्थानीयले बताएका छन् । सडकमा जेठअघि नै खाल्डाखुल्डी थिए । त्यो बेला एडीबीअन्तर्गतका सडक भन्दै कुनै ध्यान नदिएको वडा कार्यालयले अहिले भने ३० प्रतिशत बढी रुपैयाँ खर्च गरेर सडकमा ग्राभेल गरेको छ ।
अहिले स्टक रहेको नदीजन्य सामग्री किन्नुपरे जिल्ला समन्वय समितिले त्यसको प्रमाणित गर्नुपर्ने व्यवस्था रहेको जिल्ला समन्वय समितिका सदस्य टेकबहादुर बुढाले बताए । ‘नदीजन्य सामग्री ३ महिना रोकिएको छ’, उनले भने, ‘बिक्री गर्ने मान्छेले आफ्नो सामान स्टक रहेको र नदीबाट तत्काल नउठाइएको भनेर प्रमाणितसमेत गर्नुपर्ने व्यवस्था छ ।’
वडाध्यक्ष बमले त्यसबारे कुनै जानकारी नभएकोे र आफैं सम्बन्धित व्यक्तिसँग सम्पर्क गरेर ग्राभेल किनेको दाबी गरे । बिक्री गर्ने चक्र बमले श्रीपुरमा रहेको क्रसरबाट ल्याएर वडा नम्बर २ लाई ग्राभेल दिएको बताए । ठुल्ठूला ढुंगा प्रयोग गरी गुणस्तरहीन ग्राभेल हालिएको स्थानीयले बताएका छन् ।
प्रतिक्रिया दिनुहोस !
