राजविराज : दाजुको वंशनाश गरेको आरोपितसहित पाँच जना पुर्पक्षका लागि थुनामा परेका छन् ।
जिल्ला न्यायाधीश हरिश्चन्द्र ढुंगानाको आदेशले राजविराज नगरपालिका–१५ मुसर्नियाका मुर्जा भनिने पञ्चदेव साह, उनकी पत्नी प्रमिलादेवी साह, उनका भाइ विराटनगर–११ बस्ने सत्यनारायण साह, राजविराज–१५ का धर्मेन्द्र साह र थापा भनिने जिवछ साह राजविराज कारागारमा थुनामा परेका हुन् । घटनामा संलग्न थप सात जना पक्राउ परेका छैनन् ।
सप्तरीका डीएसपी भावेश रिमालका अनुसार आरोपितले सूर्यनारायण साहसहित उनकी चार महिनाकी गर्भवती पत्नी बेचनीदेवी र डेढ वर्षीया छोरी प्रतिभाको योजनाबद्ध तरिकाले हत्या गरेको बयान दिएका छन् । ‘योजनाअनुसार जेठ २६ गते गाउँनजिकै सूर्यनारायणलाई बोलाएर रक्सी खुवाइएछ’, डीएसपी रिमालले भने, ‘उनी मात्तिइसकेपछि पिसाब फेर्न गएका बेला चक्कुले प्रहार गरी अनि छोरीको घाँटी थिचेर हत्या गरेको पाइयो । त्यसपछि घरमा सुतिरहेकी बेचनीदेवीको पनि सोही रात घाँटी थिचेर हत्या गरी शौचालयको सेफ्टी ट्यांकीमा फालियो । गाउँमा दुर्गन्ध फैलिएपछि भदौ १ गते उत्खनन गर्दा बेचनीको सडेगलेको शव फेला प¥यो ।’
बेचनीका बुवा छिन्नमस्ता–६ खुदीभखारीका रामकुमार साहले छोरीको शव फेला परेदेखि नै ज्वाइँ र नातिनीको पनि हत्या गरेर आरोपितले शव बेपत्ता बनाएको दाबी गरेका थिए । प्रहरीले भने उनको दाबीप्रति विश्वास गरेको थिएन । तर, उनले प्रहरी कार्यालय धाउन नछाडेपछि प्रहरी अनुसन्धान अघि बढाउने टुंगोमा पुगेको थियो । पञ्चदेव पक्राउ परेपछि प्रहरीले घटनाको पत्ता लगाएको हो ।
प्रहरीले साउन ३ गते पुनः उजुरी लिएर नयाँ ढंगले अनुसन्धान थालेको थियो । सूर्यनारायण र प्रतिभाको शव अझै फेला नपरेको जनाइएको छ । आरोपितका अनुसार जेठ २६ गते बाबु–छोरीको हत्या गरी कोसी पश्चिमी नहर र खाँडो खोलाको दोभानमा रहेको सुरुङमा शव फालिएको थियो ।
२०४७ सालमा मृत्यु भएका भनिएका सूर्यनारायण २०७२ असार ११ गते घर फर्किएपछि सम्पत्तिमा अंश भाग लगाउनुपर्ने चिन्ताले भाइबुहारी पिरोलिएका थिए । परिवारका सदस्य तयार नभएकाले सूर्यनारायण र बेचनीको नागरिकता बन्न पाएको थिएन । यस विषयमा सूर्यनारायण र पञ्चदेवबीच विवाद हुन थालेको थियो । विवाद बढ्दै गएपछि गाउँले भेलाले असार २ गतेभित्र नागरिकता बनाइदिनुपर्ने निर्णय गरेको थियो ।
नागरिकता बनाउनुपूर्व नै सूर्यनारायणको परिवारै सिध्याएर सम्पूर्ण सम्पत्ति एकलौटी बनाउने लोभमा पञ्चदेवले हत्या योजना बनाएको प्रहरी निष्कर्ष छ । प्रहरीका अनुसार सूर्यनारायणलाई भारतको पञ्जाब लगी बिक्री गरेको आरोप लागेका चलितर साहको पनि घटनामा संलग्नता छ । राम्रो काममा लगाइदिने भन्दै १० वर्षीय सूर्यनारायणलाई लगेका चलितरले एक वर्षपछि भान्जाको मृत्यु भएको खबर ल्याएका थिए । उतै सूर्यनारायणको दाहसंस्कार गरेको खबर लिई फर्किएका उनी त्यसपछि भारत गएनन् । तर, २५ वर्षपछि घर आएर सूर्यनारायणले चलितरले आफूलाई बिक्री गरेको खुलाएका थिए ।
प्रतिक्रिया दिनुहोस !
