काठमाडौं : प्रधानमन्त्री केपी शर्मा ओलीले कञ्चनपुर घटनाका दोषीलाई कारबाहीको दायरामा ल्याउन सरकारले कुनै कसर बाँकी नराख्ने बताएका छन् ।
कञ्चनपुरमा बालिका निर्मला पन्तको बलात्कारपछि हत्या गरिएको घटनाबारे उत्पन्न परिस्थितिबारे ध्यानआकर्षण गर्न आएका नेपाल कम्युनिस्ट पार्टीका कैलाली र कञ्चनपुरका सांसद र तथा पार्टीका केन्द्रीय सदस्यसँग कुरा गर्दे प्रधानमन्त्री ओलीले यसो भनेका हुन् ।
प्रधानमन्त्री ओलीले घटनालाई सरकारले गम्भीर रुपमा लिएकोले छानविन समिति गठन गरेर काम अघि बढाएको बताए । ‘यस घटनाको आवरणमा हिंसा भड्काउने प्रयास भएका छन् । यसमा सरकार गम्भीर छ’, उनले भनेका छन्, ‘यस्ता व्यक्तिहरुको पहिचन गरी कारबाही गर्न र स्थितीलाई सहज बनाउन सुरक्षा निकायलाई निर्देशन दिइसकिएको छ ।’
घटनामा आशंका गरिएका व्यक्तिहरुलाई अनुसन्धानको घेरामा ल्याउन र दोषी भए कडा कानुनी कारबाही गर्न प्रधानमन्त्रीले निर्देशन दिएका छन् । प्रधानमन्त्री ओलीले आन्दोलनको बहानामा व्यक्तिगत र सार्वजनिक सम्पत्ति तोडफोड गर्नेलाई कानुन अनुसार कारबाही गर्न सरकार प्रतिवद्ध रहेको बताए ।
‘बालिकाको बलात्कार गरी हत्या गर्ने,आन्दोलनका नाममा तोडफोड गर्ने र हिंसा मच्चाउने सबैलाई कारबाही हुन्छ’, उनले भने, ‘यसमा सरकारले कुनै कसर बाँकी राख्दैन ।’ प्रधानमन्त्ती ओलीले घटनालाई राजनीतिकरण गर्नेहरुबाट सजग हुन आग्रह गरेका छन् ।
नेकपाका स्थायी समिती सदस्य भीम रावलको नेतृत्वको टोलीले प्रधानमन्त्री ओली र नेकपाका अध्यक्ष पुष्पमकमल दाहाललाई बालुवाटारमा भेटेर घटनाबारे जानकारी गराउँदै दोषी पत्ता लगाइ कारबाही गर्न माग गरेको थियो ।
प्रतिक्रिया दिनुहोस !
