काठमाडौं : प्रधानमन्त्री केपी ओलीले कञ्चनपुर घटनाका दोषीलाई कडा कारवाही गरिने स्पष्ट पारेका छन् । नेपाल कम्युनिस्ट पार्टी (नेकपा) का प्रदेश सातका सांसद र केन्द्रीय नेतासँग शनिबार बालुवाटारमा भेट गर्दै प्रधानमन्त्री ओलीले कञ्चनपुर घटनालाई सरकारले गम्भीर रूपमा लिएको जनाउँदै बलात्कार र हत्यामा संलग्नलाई कानुन बमोजिम कारवाही गरिने स्पष्ट पारेका हुन् ।
प्रधानमन्त्री ओलीले भने, ‘सरकारले घटनालाई गम्भीर रूपमा लिएर छानबिन समिति गठन गरिसकेको छ । घटनाका दोषीलाई कारबाही गर्न कुनै कसर बाँकी राखिँदैन ।’ उनले घटनालाई उत्तेजित बनाएर हिंसा फैलाउने काम भएको भन्दै त्यस्ता व्यक्तिको पनि पहिचान गरी कारबाही गर्न सुरक्षा निकायलाई निर्देशन दिइसकेको जनाए ।
१३ बर्षीया बालिका निर्मला पन्तको बलात्कारपछि हत्या भएको घटनालाई लिएर कञ्चनपुरमा चर्किएको आन्दोलनबारे नेकपा नेताहरूले प्रधानमन्त्री र नेकपा अध्यक्ष पुष्पकमल दाहाललाई ध्यानाकर्षण गराएका हुन् । ‘अहिले घटनाको आवरणमा हिंसा मच्चाउने र परिस्थितिलाई उत्तेजित बनाउने काम भइरहेको छ’, प्रधानमन्त्रीको भनाइ उद्धृत गर्दै कञ्चनपुर तीनबाट निर्वाचित नेकपाका सांसद डा.दीपकप्रकाश भट्टले भने, ‘हिंसा मच्चाउने र बलात्कारपछि हत्यामा संलग्न सबैलाई कारवाही हुन्छ । अपराधीले कुनै पनि हालतमा मुक्ति पाउनुहुँदैन ।’
नेकपाका नेताहरुले घटनाको अनुसन्धानमा ढिलाइ भएको तथा स्थानीय प्रशासनले आन्दोलनकारीमाथि अत्याधिक बल प्रयोग गरेको भन्दै प्रधानमन्त्रीको ध्यानाकर्षण गराएका थिए । नेकपा नेता लेखराज भट्टले भने, ‘हामीले केन्द्रबाट नै उच्चस्तरीय छानबिन समितिको माग ग¥यौं । प्रहरी प्रशासनले आन्दोलनकारीमाथि निशाना बनाएरै गोली प्रहार गरेका दृष्य देखिएका छन् । यो पनि छानबिन हुनुपर्छ । छिटो भन्दा छिटो घटनाको अनुसन्धान गरेर वास्तविकता ल्याउनुपर्छ भनेर भनेका छौं ।’
‘घटनाको छिटो छानबिन हुनुपर्छ । कञ्चनपुर घटनाको वास्तविकता लुकाउन खोजिएको छ’, कञ्चनपुर २ बाट निर्वाचित नेकपाका सांसद नरबहादुर धामीले भने, ‘सरकारले बास्तविकता लुकाउने भन्दा पनि यथार्थ के हो त्यसलाई छिटो सार्वजनिक गर्नुपर्छ ।’
नेता लेखराज भट्टले शुक्रबार मृत्यु भएका प्रदर्शनकारीका परिवार र बलात्कारपछि हत्या गरिएकी पन्तका परिवारलाई पनि राहतको व्यवस्था गर्न माग गरे ।
प्रधानमन्त्री ओलीले भने घटनाको अनुसन्धानका लागि नयाँ टोली पठाइए पनि त्यसलाई काम गर्न नदिएकोप्रति आक्रोश व्यक्त गरे । ‘घटनाको छानबिनका लागि नयाँ टोली गएको छ । उसलाई काम गर्न अवरोध पु¥याउने खालका कामहरू भएका छन्’, प्रधानमन्त्री ओलीले भने, ‘पीडितले न्याय पाउनुपर्छ भन्नेमा शंका छैन । तर आन्दोलनको आवरणमा हिंसा मच्चाउने काम भएको छ ।’
नेकपाका स्थायी समिती सदस्य भीम रावल नेतृत्वको टोलीले प्रधानमन्त्री ओली र अध्यक्ष दाहाललाई बालुवाटारमा भेटेर घटनाको बारेमा जानकारी गराउँदै दोषी पत्ता लगाउन र कारबाही गर्न माग गरेको थियो । बालुवाटारमा प्रधानमन्त्री ओलीसहित अर्का अध्यक्ष पुष्पकमल दाहाल, संसदीय दलका उपनेता सुवासचन्द्र नेम्वाङ, महासचिव विष्णु पौडेललगायतका नेता उपस्थित थिए ।
एसपी विष्ट निलम्बित
गृह मन्त्रालयले जिल्ला प्रहरी कार्यालय कञ्चनपुरका तत्कालीन प्रमुख एसपी डिल्लीराज बिष्टलाई निलम्बन गरेको छ । गृहमन्त्री रामबहादुर थापा, गृहसचिव र तीनवटै सुरक्षा निकायका प्रमुखसहित बसेको बैठकले निर्मला हत्याको घटनासम्बन्धमा विस्तृत छानबिनमार्फत् तथ्य बाहिर नआएसम्मका लागि एसपी बिष्टलाई निलम्बन गर्ने निर्णय गरेको हो । बैठकले तत्कालीन प्रमुख जिल्ला अधिकारी कृष्णकुमार खड्का, डिएसपी ज्ञानबहादुर सेठ्ठी र मुद्दा शाखाका प्रहरी निरीक्षक एकेन्द्र खड्कालाई छानबिनका लागि केन्द्रमा झिकाउने निर्णयसमेत गरेको छ ।
कञ्चनपुर घटनामा एसपी बिष्टको भूमिका शंकास्पद देखिएको र घटनाको अनुसन्धानमा चासो नदेखाएको कारण दर्शाउँदै गृहले निलम्वन गर्नुपर्ने अवस्था आएको जनाएको छ । गृहमन्त्रीका प्रेस संयोजक किरण भट्टराईका अनुसार गृहमन्त्रीले नेपाल प्रहरी, सशस्त्र र राष्ट्रिय अनुसन्धान विभागका प्रमुखलाई बलप्रयोग गर्दा संयमता अपनाउन निर्देशन दिएका छन् ।
मन्त्री थापाले घटनाको अनुसन्धाना जरैसम्म पुगेर गर्न र दोषी जोकोही भएपनि कारबाहीको दायरामा ल्याउन प्रहरी महानिरीक्षक सर्वेन्द्र खनाललाई निर्देशन दिएका थिए ।
प्रर्दशनकाक्रममा गोली नै चलाउनुपर्ने अवस्थाका बारेमासमेत गृहमन्त्री थापाले आइजीपी खनालसँग प्रष्टिकरण मागेका थिए ।
नेविसंघको प्रर्दशन
नेपाल विद्यार्थी संघले महेन्द्रनगर घटनाका विरुद्धमा शनिबार काठमाडांैमा प्रर्दशन गरेको छ । नेविसंघका महामन्त्री कुन्दनराज काफलेको नेतृत्वमा शनिबार दिउसो भुकृटीमण्डपबाट जुलुस निकालिएको थियो ।
प्रतिक्रिया दिनुहोस !
