- ५५ वर्षीया कारीदेवी यादवको शव १६ दिनपछि भेटेर प्रहरीमा खबर ।
- प्रहरीले नेताको दबाब वा आर्थिक प्रलोभनमा चासो नलिएको गुनासो ।
- दुई अभियुक्तलाई पनि स्थानीयले नै नियन्त्रणमा लिएर प्रहरीमा बुझाए ।
- दोषीमाथि कारबाहीको माग गर्दै थालिएको आन्दोलन वार्तापछि स्थगित ।
- घटना अनुसन्धानमा ढिलाइ भएको सिरहाका सीडीको स्विकारोक्ति ।
गोलबजार : बेपत्ता भएको १६ दिनपछि सिरहाको गोलबजार नगरपालिकाकी ५५ वर्षीया कारीदेवी यादवको शव शनिबार फेला परेको छ । गोलबजार–१ पुरानो चोहर्बाकी कारीदेवीको शव स्थानीयले नरहा गाउँपालिका–१ गौरहा गाउँको बाँसघारीमा गाडिएको अवस्थामा फेला पारेका हुन् । उनलाई मृत फेला पारेपछि स्थानीयले प्रहरीलाई जानकारी गराएका थिए ।
उनी बेपत्ता भएकै दिनदेखि स्थानीय खोजीमा जुटेका थिए । उनी गत साउन २५ गते राति घरबाटै बेपत्ता भएकी थिइन् । स्थानीयले शनिबार कारीदेवीको हत्यामा संलग्न दोषीलाई कारबाही गर्नुपर्ने मागसहित पूर्व–पश्चिम राजमार्गमा दुई घण्टा चक्काजामसमेत गरे । प्रमुख जिल्ला अधिकारी रुद्रप्रसाद पण्डित र जिल्ला प्रहरी प्रमुख एसपी जीवन श्रेष्ठसँग वार्ता भएपछि स्थानीयले आन्दोलन स्थगन गरेका छन् । स्थानीयले गोलबजारमा रहेका प्रहरी जनशक्तिको सरुवा गर्न पनि पण्डित र श्रेष्ठसँग माग गरेका छन् । यो घटनालाई गोलबजार प्रहरीले गम्भीरतापूर्वक नलिएको उनीहरूको आरोप छ ।स्थानीयले कारीदेवीका नाममा रहेको सम्पत्ति हत्याउन जेठाजु रामदेव यादव र भतिजा लक्ष्मण यादवले हत्या गरेको दाबी गरेका छन् । हत्याका आरोपित दुवै अभियुक्तलाई स्थानीयले नै यही भदौ ५ गते नियन्त्रणमा लिई प्रहरीको जिम्मा लगाएका थिए । शव गाडिएको बाँसघारी रामदेवको सालोको रहेको जनाइएको छ । लक्ष्मणले मामाका छोरा राधेश्यामसँग मिलेर कारीदेवीको हत्या गरेको स्थानीयको आरोप छ ।
बेपत्ता भएको १६ दिन बित्दा पनि प्रहरी र स्थानीय प्रशासनले ठोस रूपमा अनुसन्धान नबढाएको आरोप स्थानीयले लगाएका छन् । ‘गाउँलेले नै रामदेव र लक्ष्मणलाई नियन्त्रण लिई प्रहरीलाई जिम्मा लगाए’, स्थानीय प्रमोद महतोले भने, ‘शव पनि गाउँलेले खोज्यो । प्रहरी–प्रशासनले यत्रो घटना हुँदा पनि चासो देखाएन ।’ नेताको दबाब वा पैसाको चलखेलले गर्दा प्रहरी अपराधीलाई जोगाउन लागिपरेको आरोप उनले लगाए । ‘मान्छे मारिँदा पनि प्रहरी–प्रशासन संवेदनशील नभइदिँदा सर्वसाधारण त्रसित बनेका छन्’, उनले भने ।
यो घटनामा गोलबजार प्रहरी गम्भीर नदेखिएको वडाध्यक्ष देवनारायण महतोको भनाइ छ । ‘स्थानीयले सुराक दिँदै गयो तर प्रहरीले अनुसन्धान नै थालेन’, वडाध्यक्ष महतोले भने, ‘कसको दबाबमा प्रहरीले हत्याको छानबिन गरेनन् ? त्यो सार्वजनिक गरिनुपर्छ ।’ नेताको दबाब वा पैसाको प्रलोभनमा प्रहरी अपराधी संरक्षणमा लाग्नु उचित नभएको उनले बताए ।
स्थानीयसँग वार्तापछि सीडीओ पण्डितले हत्यामा संलग्न दोषी र घटनाको अनुसन्धानमा बेवास्ता गर्ने प्रहरीलाई कारबाहीको दायरामा ल्याउने प्रतिबद्धता जनाए । ‘गोलबजारका प्रहरीलाई हामी सोधखोज गर्छाैं’, उनले भने, ‘दोषी भेटिए तुरुन्त कारबाही हुन्छ ।’ घटना अनुसन्धानमा प्रहरीबाट ढिलाइ भएको उनले स्थानीयमाझ स्वीकार गरेका छन् ।
अभियुक्त नै पहिले प्रहरीमा
रामदेवले पक्की घरमा बस्न नदिएपछि कारीदेवी छेउमा झुपडी बनाएर बस्ने गर्थिन् । झुपडीको आधी भागमा उनले गुजाराका लागि पालेका दर्जन बाख्रा बाँधेकी थिइन् । गत साउन २५ गते राति करिब ८ बजे वर्षा हुँदै थियो । गाउँमा बिजुली थिएन, त्यही बेला उनलाई बेपत्ता पारिएको स्थानीयको भनाइ छ ।
त्यसको तीन दिनपछि लक्ष्मणले नै इलाका प्रहरी कार्यालय गोलबजारमा कारीदेवीको खोजीका लागि निवेदन दर्ता गराए । स्थानीयले भने घटनामा रामदेव र लक्ष्मणकै संलग्नता रहेको दाबी गर्दै यही भदौ ५ गते नियन्त्रणमा लिएर प्रहरीमा बुझाए । भदौ ६ गते गोलबजार नगरपालिका–१ का एमकुमार यादवले रामदेव र लक्ष्मण नाम किटान गरी इलाका प्रहरी गोलबजारमा अपहरण तथा शरीर बन्धक जाहेरी दर्ता गराए । एमकुमार कारीदेवीकी दिदीका छोरा रहेको जनाइएको छ । उनकै जाहेरीअनुसार प्रहरीले पनि अदालतबाट सात दिनको म्याद थप गरी दुवै अभियुक्तविरुद्ध कारबाही प्रक्रिया अघि बढाएको छ ।
के थियो विवाद ?
कारीदेवीको न पति छन् न त छोराछोरी नै, उनी एक महिला हुन् । माइतमा पनि कोही नरहेको स्थानीयले बताएका छन् । पैतृक सम्पत्तिबाट उनी र जेठाजु रामदेव नाममा १÷१ कट्ठा जग्गा आइसकेको छ । अंशबन्डा नहुँदा बाँकी जग्गा उनका ससुरा जुगेश्वर यादवकै नाममा रहेको जनाइएको छ । जब कारीदेवीले ससुराका नाममा रहेको जग्गा बाँडफाँट गर्न माग गर्न थालिन् तब रामदेवसँग विवाद सुरु भएको स्थानीयको भनाइ छ ।
संयुक्त घडेरीमा तीन वर्षअघि पक्की घर बनाउन लाग्दा कारीदेवीले आफ्नो जग्गा छुट्याएर मात्रै घर बनाउन भनेपछि विवाद भएको थियो । रामदेव र लक्ष्मणले गालीगलौज र कुटपिट गरेपछि उनी बेग्लै बस्न थालेको स्थानीयवासीले बताए । त्यसपछि उनले कसैको वास्ता नगरी बाख्रा पालेर गुजारा चलाउँदै आएकी थिइन् ।
१३ कट्ठा दुई धुर जग्गा जुगेश्वरको नाममा रहेको जनाइएको छ । उक्त जग्गा अंशबन्डा गर्न कारीदेवीले अघिल्लो भदौ ५ गते जिल्ला अदालत सिरहामा रामदेवलाई प्रतिवादी बनाई मुद्दा दर्ता गराएकी थिइन् । अदालतले गत जेठ २४ गते कारीदेवीको पक्षमा फैसला सुनायो । कारीदेवीले आफ्नो तर्फबाट मुद्दाका वारिस गोलबजार–९ का पुणित यादवलाई बनाएकी थिइन् । ‘पुणितलाई कारीदेवीले नाति भनेर बोलाउँथिन्, जग्गाको मुद्दामा पुणितले नै सबै काम गर्दैथ्यो’, लक्ष्मणकी पत्नी विभा यादवले भनिन्, ‘आफू घरका मान्छे भएर पनि कस्तो नाताले नाति भएको थाहा छैन ।’ रामदेव र लक्ष्मणलाई कारीदेवीले फसाउन खोजेको उनको जिकिर छ ।
प्रतिक्रिया दिनुहोस !
