महेन्द्रनगर : आइतबार बिहान ५ घण्टाका लागि हटाइएको कफर्यू पुनः कायम गरिएको छ । जिल्ला प्रशासन कार्यालय कञ्चनपुरले भीमदत्त नगरपालिकाको ४ र १८ नम्बर वडामा शुक्रबार रातिदेखि लगाएको कर्फ्यू आइतबार बिहान ५ बजेदेखि १० बजेसम्मका लागि हटाइएको भएपनि पुनः कायम गरिएको हो । सहायक प्रमुख जिल्ला अधिकारी शंकर विष्टले जनैपूर्णिमा र रक्षाबन्धनलाई मध्यनजर गरेर बिहान ५ घण्टाका लागि हटाइएको कफर्यू पुनः कायम गरिएको बताए । उनले शुक्रबारदेखिको कफर्यूले जनजिवन समेत प्रभावित भएपछि केही खुकुलो पारिएपनि फेरि यथावत नै रहेको जानकारी दिए ।
‘परिस्थिती हेरेर कफर्यू खुकुलो पार्दै जाने छौं’उनले भने,‘ सुरक्षा समितिको बैठकले आवश्यकता हेरेर खुकुलो बनाउने र हटाउने विषयमा निर्णय गर्नेछ।’ १३ वर्षीया बालिकाको बलात्कार पछि हत्या भएको विषयलाई लिएर आन्दोलन चर्किएपछि स्थानीय प्रशासनले बिहीबारसाँझदेखि नै कर्फ्यू आदेश जारी गरेको थियो । शुक्रबार बिहान कर्फ्यू हटेपछि दिउँसो फेरि आन्दोलन चर्किएको थियो ।
शुक्रबार साँझपख एक्कासी आन्दोलन हिंसात्मक बन्न पुगेपछि प्रहरीले चलाएको गोली लागेर १७ वर्षीय सन्नी खुनाको मृत्यु भएको थियो । गोली लागेर दर्जनौं घाइते भएका थिए । आइतबार बिहान ५ घण्टाका लागि कफर्यू हटाइएको समयमा महेन्द्रनगर बजारमा सर्वसाधारणको भीड लागेको थियो । दैनिक उपभोग्य सामाग्री किनमेल गर्न, रक्षाबन्धन र जनैपूर्णिमा आवश्यक सामाग्री खरिद गर्नका लागि सर्वसाधारणको भीड लागेको थियो ।
प्रतिक्रिया दिनुहोस !
