नुवाकोट : यहाँ भएका छुट्टाछुट्टै घटनामा दुई बालकको ज्यान गएको छ । एक बालकको काठमिलमा परेर र अर्का बालक पहिरोमा पुरिएर ज्यान गएको जिल्ला प्रहरी कार्यालय नुवाकोटले जनाएको छ ।
विदुर नगरपालिका–४ बट्टार आँपघारीमा सोमवार काठमिलमा परेर स्थानीय तीन वर्षीय सुमिङ श्रेष्ठको ज्यान गएको प्रहरी नायव उपरीक्षक भीमलाल भट्टराइले जानकारी दिए ।
हजुरबुवा हिमालबहादुरले सञ्चालन गरेको काठमिलको आरामा चिरिएर स्थानीय मन्टेश्वरी विद्यालय नर्सरीमा अध्ययनरत बालकको घटनास्थलमै ज्यान गएको उनले वताए ।
आरामा चिरिएर रक्ताम्य भएका बालकलाई केही बेरपछि स्थानीयले देखेका थिए । टाउकोमा आराले गहिरो चिरेका कारण अस्पताल लैजानै नपाई उनको मृत्यु भएको नुवाकोट प्रहरीले जनाएको छ ।
बाालकका बाबु प्रकाश तीन वर्षदेखि जापानमा छन् । मृतक बालककी दिदी छिन् । उनको सोमबारै अन्तिम संस्कार गरिएको छ ।
शिवपुरीमा गोठालो जाँदा पहिरोले पुरिएर एक बालकको ज्यान गएको छ । पहिरोमा पुरिएर सदरमुकाम विदुरदेखि ४५ किलोमिटर पुर्वमा रहेको शिवपुरी गाउँपालिका–६ का नौ वर्षीय वालक अर्पण तामाङको ज्यान गएको नुवाकोट प्रहरीले जनाएको छ ।
बाख्रा गोठालो गएका अर्पणलाई स्थानीय च्यानडाँडाको खोल्सामा पहिरो खसेर पुर्दा ज्यान गएको नुवाकोट प्रहरीले जनाएको छ । उनको घटनास्थलमै मृत्यु भएको हो ।
प्रतिक्रिया दिनुहोस !
