डडेल्धुरा : सरमुकाम नजिकैको अमरगढी नगरपालिका-२ आइतबजार नजिकैको ठूला खोलामा जीप दुर्घटना हुँदा नौंजना घाइते भएका छन्। बगरकोटबाट सदरमुकामतर्फ आउँदै गरेको ना १ ज ३११९ नम्बरको पीकअप जीप मंगलबार दिउँसो करिब १२:३० बजेतिर दुर्घटना भएको हो।
घाइते हुनेमा भागेश्वर गाउँपालिका-४ की शारदा मडै, सोही ठाउँका टेक मडै, सरस्वती गौली विष्ट, भागेश्वर-५ का रामदत्त जोशी, अजयमेरु गाउँपालिका-५ का बहादुर खड्का, सोही ठाउँका हिरा खड्का रहेको जिल्ला प्रहरी कार्यालय डडेल्धुराका प्रहरी नायब उपरीक्षक डम्बरबहादुर केसीले जानकारी दिए।
यस्तै कञ्चनपुरको झलारी नगरपालिका-१० की लक्ष्मी खडायत, अजयमेरु-५ का पुरुषोत्तम जोशी, गान्याधुरा गाउँपालिका-३ की देवादेवी कठायत पनि घाइते भएको उनले बताए। घाइते सबैको डडेल्धुरास्थित उप-क्षेत्रीय अस्पतालमा उपचार भइरहेको जनाइएको छ। घाइतेको टाउको, छाती र खुट्टामा चोट लागेको प्रहरीले बताएको छ। जीपमा चालकसहित १५ जना सवार रहेको प्रहरीले जनाएको छ।
गुँरास यातायात समिती बैतडीद्धारा सञ्चालित जीप क्षमताभन्दा बढी यात्रु र वर्षाले सडक चिप्लो भएका कारण दुर्घटना भएको हुनसक्ने प्रहरीको अनुमान छ।
जीप दुर्घटनाका घाइते भएकाको डडेल्धुरास्थित उप-क्षेत्रीय अस्पतालमा उपचार हुँदै।
प्रतिक्रिया दिनुहोस !
