जकार्ता (इन्डोनेसिया) : एसियाली खेलकुदको १८औं संस्करणमा नेपाल पदकविहीन बन्ने सम्भावना बढिरहेको बेला प्रतियोगिताको ११औं दिन नयाँ खेल प्याराग्लाइडिङले केही आशा जगाएको छ । पहिलो पटक एसियाली खेलकुदमा समावेश गरिएको प्याराग्लाइडिङले मंगलबार उत्कृष्ट प्रदर्शन गर्दै जारी एसियाडमा नेपालका लागि पहिलो पदक जित्ने सम्भावना प्रबल बनाएको हो ।
प्याराग्लाइडिङको पुरुष टिम क्रसकन्ट्री स्पर्धामा मंगलबार चौथो चरणको खेल सकिँदासम्म नेपाली टोली उत्कृष्ट प्रदर्शनसहित दोस्रो स्थानमा उक्लिएको छ । प्रतियोगिताको पहिलो चरणमा नेपाल तेस्रो स्थानमा थियो । दोस्रो चरणको खेल सकिँदा पनि नेपाली टोलीले आफूलाई तेस्रो स्थानमा यथावत् राखेको थियो ।
यसैगरी सोमबार तेस्रो चरणको खेल सकिँदा नेपाल चौथो स्थानमा झरेको थियो । चौथो दिन मौसमका कारण केही ढिलो सुरु भएको खेलमा नेपालले सुस्त सुरुआत गरेको थियो । सोही कारणले मंगलबारको खेलमा लामो समयसम्म नेपाली टोली सातौं स्थानमा झरेको थियो ।
तर, त्यसपछि खेलमा उत्कृष्ट पुनरागमन गरेको नेपाली टोलीले आफूलाई दोस्रो स्थानमा फर्काउन सफल भयो । कुल १० टोली सहभागी उक्त स्पर्धाको फाइनल चरणको खेल बुधबार हुनेछ । आफ्नो यही प्रदर्शनलाई निरन्तरता दिए नेपाली टोलीले कम्तीमा कांस्य पदक जित्ने प्रबल सम्भावना छ ।
यद्यपि, हाल दोस्रो स्थानमा रहेकाले बुधबार उक्त स्पर्धामा नेपाली खेलाडीले स्वर्ण पदकका लागि नै भिडन्त गर्नेछन् । नेपाली पुरुष टोलीमा विमल अधिकारी, विजय गौतम, सुशील गुरुङ, युकेश गुरुङ र विशाल थापा रहेका छन् । पुरुषतर्फ जापान पहिलो, दक्षिण कोरिया तेस्रो, आयोजक राष्ट्र इन्डोनेसिया चौथो र मलेसिया पाँचौं स्थानमा छन् ।
यसैगरी प्याराग्लाइडिङकै महिला टिम क्रसकन्ट्री स्पर्धामा भने चौथो चरणको खेल सकिँदासम्म नेपाली टोली छैटौं स्थानमा आसिन छ । पहिलो चरणको खेल सकिँदासम्म नेपाल चौथो स्थानमा थियो । दोस्रो चरणको खेल सकिँदा भने नेपाली टोली तेस्रो स्थानमा उक्लिएको थियो । तेस्रो चरणको खेल सकिँदा भने नेपाली महिला टोली छैटौं स्थानमा झरेको थियो ।
महिलातर्फको फाइनल चरणको खेल पनि बुधबार नै हुनेछ । उक्त स्पर्धामा समेत नेपालले पदक जित्ने सम्भावना भने कायमै छ । महिलातर्फ पनि १० टोली सहभागी छन् । नेपाली महिला टोलीमा प्रतिभा भुजेल, तृषा तामाङ र सविता तामाङ सहभागी छन् । महिलातर्फ दक्षिण कोरिया पहिलो, जापान दोस्रो, आयोजक इन्डोनेसिया तेस्रो, थाइल्यान्ड चौथो र मलेसिया पाँचौं स्थानमा छन् ।
दौडिएनन् धावक यामसाजन
एथलेटिक्सको पुरुष दुई सय मिटर दौडको छनोट चरणमा मंगलबार नेपाली धावक यामसाजन सुनार आफ्नो लेनमा देखा परेनन् । समाचार संकलनका लागि मध्य जकार्तास्थित जेलोरा बुङ कार्नो रंगशाला पुगेका सञ्चारकर्मी यामसाजनको अनुपस्थितिबाट केही आश्चर्यमा परे ।
‘याम साजनको तिघ्राको मांसपेशीमा समस्या देखिएकाले उनी दुई सय मिटर दौडमा सहभागी नभएका हुन्’, अन्नपूर्ण पोस्ट्को जिज्ञासामा राखेपअन्तर्गत तालिम तथा प्रशिक्षण विभागका निर्देशक रिम रानाभाटले भने । यसअघि यामसाजनको मांसपेशीमा समस्या देखिएको कुरा सञ्चारकर्मीलाई जानकारी गराइएको थिएन ।
राष्ट्रिय टिम तयारी समितिका संयोजकसमेत रहेका रानाभाटले दुई दिनअघि एक सय मिटर दौडमा प्रतिस्पर्धा गर्ने क्रममा यामसाजनको तिघ्राको मांसपेशीमा समस्या आएको बताए । गत शनिबार भएको पुरुष एक सय मिटर दौडमा २५ वर्षीय यामसाजन हिट चरणबाटै बाहिरिएका थिए ।
एक सय मिटर दौडमा हिट तीनको लेन सातबाट प्रतिस्पर्धा गरेका यामसाजन आफ्नो हिटमा आठौं तथा अन्तिम स्थानमा आएका थिए । यामसाजनले निर्धारित दूरी पार गर्न ११.३९ सेकेन्ड समय खर्चिएका थिए । सोही स्पर्धाका क्रममा उनको मांसपेशीमा समस्या आएका बताइएको छ ।
‘यामसाजनले आफ्नो तिघ्राको मांसपेशीमा समस्या आएकाले दुई सय मिटर दौडमा भाग लिन नसक्ने भन्दै राखेपका सदस्यसचिवलाई निवेदन दिएका थिए । घाइते भएका खेलाडीलाई खेलाउने कुरा पनि आएन । त्यसैले उनी दुई सय मिटर दौडमा अनुपस्थित भएका हुन् । आफू अहिले फिजियोको रेखदेखमा रहेको पनि यामसाजनले आफ्नो निवेदनमा उल्लेख गरेका छन्’, रानाभाटले भने ।
नेपालका यामसाजन मात्र होइन, दुई सय मिटर दौडमा अन्य तीन राष्ट्रका खेलाडीले पनि सहभागिता जनाएनन् । ३१ जना धावकको सहभागिता रहेको उक्त स्पर्धामा एकजना धावक भने दौडका लागि अयोग्य घोषित भएका थिए । केवल २६ जना खेलाडीले दौड पूरा गरेका थिए ।
यसअघि गत शनिबार म्याराथन स्पर्धामा दुवैजना नेपाली खेलाडीले बीचैमा दौड छाडेका थिए । पुरुष म्याराथनमा नेपाली धावक कृष्णबहादुर बस्नेतले लक्ष्यनजिक पुग्नुभन्दा करिब दुई किलोमिटर पहिले दौड छाडेका थिए भने अर्का धावक गोपीचन्द्र पार्कीले ३० किलोमिटर दूरी पार गरेपछि दौड त्यागेका थिए । नेपाली खेल अधिकारीले इन्डोनेसियाको मौसमका कारण खेलाडीले दौड पूरा गर्न नसकेको दाबी गरेका थिए ।
एथलेटिक्सकै महिला पाँच हजार मिटर दौडमा नेपालकी विश्वरूपा बुढा सहभागी १५ खेलाडीमध्ये १३औं स्थानमा आइन् । उनले निर्धारित दूरी पार गर्न १७ मिनेट २४.७८ सेकेन्ड समय खर्चिइन् । उक्त स्पर्धामा बहराइनकी खेलाडी फकादु किदिनले स्वर्ण, कजाकस्तानकी दारिया मास्लोभाले रजत र बहराइनकै रेबितु बोन्टुले कांस्य पदक जिते ।
यसैगरी मंगलबार नै भएको पुरुष भलिबलमा नेपालले मंगोलियालाई ३—१ ले पराजित गर्यो । पहिलो सेटमा २६—२८ ले पराजित भएको नेपाली टोलीले त्यसपछि खेलमा उत्कृष्ट पुनरागमन गरेको थियो । नेपाली टोलीले पछिल्ला तीन सेटको नतिजालाई क्रमशः २५—१६, ३०—२८, २५—१९ ले आफ्नो पक्षमा पारेको थियो ।
यसैगरी मंगलबारदेखि सुरु भएको कुराँस खेलमा दुवै नेपाली खेलाडी पहिलो दिन नै पराजित भएका छन् । ६६ केजीभन्दा मुनिको तौलसमूहमा आफ्नो पहिलो खेलमा जित हात पारेका नेपाली खेलाडी उपेन्द्र थापा दोस्रो खेलमा भने पराजय स्विकार्न बाध्य बने ।
उपेन्द्रले आफ्नो पहिलो खेलमा पाकिस्तानका समिउल्लाह सैयदलाई १—० ले हराउँदै प्रिक्वार्टरफाइनलमा स्थान पक्का गरेका थिए । तर, प्रिक्वार्टरफाइनलमा उनी उज्बेकिस्तानका खेलाडी रुस्लान बुरिएभसँग १०—० ले पराजित भए ।
यसैगरी कुराँसकै महिला ५२ केजीभन्दा मुनिको तौलसमूहमा नेपालकी भगवती माझी आफ्नो पहिलो खेलमै पराजित भइन् । उनलाई उज्बेकिस्तानकी सोसु चिआवेनले ०—१० अंकले पराजित गरिन् । कुराँस खेलमा नेपालले यही दुई स्पर्धामा मात्र सहभागिता जनाएको छ ।
यसैगरी सेपाकताक्रोको पुरुषतर्फको प्रारम्भिक चरणमा भियतनामले नेपाललाई २—० ले हरायो । स्क्वासको महिला टिम स्पर्धामा पनि नेपाली टोली जापानसँग ०—३ ले पराजित हुन पुग्यो ।
प्रतिक्रिया दिनुहोस !
