काठमाडौँ : इन्डोनेसियामा जारी १८ औँ संस्करणको एसियाली खेलकुद प्रतियोगिताबाट नेपालले खाली हात फर्किनु नपर्ने भएको छ । प्याराग्लाइडिङतर्फ पुरुष टिम क्रस कन्ट्रीतर्फको टोलीले रजत पदक जित्न सफल भएसँगै नेपालले रित्तै फर्किनुपर्ने बाध्यता टरेको हो ।
पोखरा र स्याङ्जामा गरिँदै आएको प्याराग्लाइडिङले पर्यटकलाई मात्रै खुसी बनाएन देशलाई समेत पदक दिँदै इज्जत बचाइदिन सफल भयो । यो पकट राष्ट्रिय खेलकुद परिषद्ले आश गरेका तेक्वान्दो, कराँते, बक्सिङ र ब्याडमिन्टन सबै खेलमा निराशा हात लागेका बेला प्याराग्लाइडिङले देशको इज्जत जोगाइदिएको हो ।
राखेपका सदस्य सचिव केशवकुमार विष्टले काठमाडौँबाट एसियाडमा उड्नुअघि र इन्डोनेसियामा पनि कराँते, तेक्वान्दोसहितका खेलमा पदक जित्ने दाबी गरेका थिए । राखेपले लगानी गरेका कुनै पनि खेलमा पदक हात नलागेको अवस्थामा प्याराग्लाइडिङले पहिलो सहभागितमै रजत जित्यो ।
पाँचौ तथा अन्तिम राउन्डको खेलमा जापानसँग २७ अंकको झिनो अन्तरले पराजित भएर नेपालले रजत जितेको हो । सन् १९९८ मा बैंककमा भएको एसियाडमा तेक्वान्दोकी सविता राजभण्डारीले रजत जितेकी थिइन् ।
नेपाली प्याराग्लाइडरले रजत जितेपछि एसियाडको खेलस्थलमा पुगेका खेल पदाधिकारी, नेपाली खेल प्रेमी र अन्य खेलका खेलाडी पनि खुसीले नाचेका थिए ।
प्याराग्लाइडिङमा रजत जितेका नेपाली प्याराग्लाइडरहरु कप्तान विमल अधिकारी, विजय गौतम, सुशील गुरुङ, युकेश गुरुङ र विशाल थापाले भादगाउँले टोपीमा सजिएर पदक ग्रहण गरे । उनीहरुले राष्ट्रिय झण्डा फहराउँदै देशको गौरव बढाएकोमा खुसी बाँडे ।
प्रतिक्रिया दिनुहोस !
