काठमाडौं : पर्यटन मन्त्रालयले नेपाल वायुसेवा निगमको वाइडबी जहाज छानविन समिति बुधबार परिवर्तन गरेको छ । जहाज खरिद सम्झौता गर्दा निगम सञ्चालक समिति सदस्य रहेका बुद्धिसागर लामिछाने यसको संयोजक बनाइएका छन् ।
खरिद निर्णयकर्ताबाटै समिति बनाइएको भन्दै आचार्यको समितिको आलोचना भएको थियो । बदलामा झन् खरिदमै संलग्न अर्का सहसचिव लामिछानेलाई ल्याइएको हो । आचार्यको समितिले दुई पटक बैठक गरिसकेको थियो ।
बिचौलिया प्रयोग गरी किनिएका दुई विमानमा ठूलो मात्रामा आर्थिक चलखेल भएको आशंकमा अख्तियारले छानबिन सुरु गरेको छ । महालेखापरीक्षकले पनि यसमा कडा प्रश्न उठाएको छ । त्यसलाई छानबिनका नाममा ढाकछोप गर्न मन्त्रालयले निर्णयकर्ताकै समिति बनाएको हो ।
म्याद १५ कार्यदिन दिइएको समितिका संयोजक लामिछानेले यसलाई ‘वाइडबडी जहाज खरिद अध्ययन समिति’ रहेको बताए । ‘यो समितिले हाल बाहिर आएका विषय र जहाज खरिदमा भएका सत्यतथ्य के रहेछन् भनेर पारदर्शी प्रतिवेदन सार्वजनिक गर्नेछ’, उनले भने, ‘जहाज खरिद पारदर्शी नै छ । जे भएको थियो, प्रक्रियाअनुसारै थियो । तर, पनि अध्ययन गर्नुपर्ने भएकाले मन्त्रालयले समिति बनाएको हो ।’
लामिछाने संयोजकत्वको समितिमा निगम सञ्चालक समिति सदस्य मुक्ति पाण्डे र नागरिक उड्डयन प्राधिकराणका एक प्रतिनिधि र आवश्यकता अनुसार विज्ञ राख्न सक्ने गरी हाललाई ३ सदस्यीय बनाइएको छ । ‘जसमाथि छानविन हुनुपर्ने हो, उसैको छानविन समिति बनाएपछि कस्तो प्रतिवेदन देला ? ’ मन्त्रालयका एक अधिकारीले भने ।
प्रतिक्रिया दिनुहोस !
