मलंगवा : गोडमेल गरेर मल हाल्ने समयमा मलको सहज पहुँच नहुँदा सर्लाहीका धान किसान चिन्तित बनेका छन् । जिल्लामा सहज पहुँच नहुने र भारतबाट ल्याउन नपाएपछि झन् ठूलो समस्या भोग्नुपरेको किसानले बताएका छन् ।
कृषि सामग्री केन्द्रले सहकारी संस्थामार्फत मल बिक्री वितरण गर्न थालेपछि किसानले चर्को मूल्यमा मल किन्न बाध्य हुनुपरेको हो । जिल्लामा १५ सयदेखि २ हजार टनसम्म मल आवश्यक परे पनि कृषि सामग्री केन्द्रमा आवश्यक मल नआउँदा किसानलाई समस्या भएको हो । केन्द्रबाट ७ सय ६५ रुपैयाँमा बिक्री हुँदै आएको प्रतिबोरा मल किसानले ९ सयदेखि ९ सय ५० रुपैयाँमा किन्नुपर्ने अवस्था आएको छ । सहकारीको मल पनि व्यापारीकहाँ पुग्दा किसान चर्को मूल्य तिर्न विवश बनेका छन् ।
जिल्लामा अहिले ६३ टन मल मात्रै रहेको केन्द्र प्रमुख बज्रमणि लामाले बताए । जिल्लामा ४६ हजार हेक्टर क्षेत्रफलमा धानखेती भएको छ । ‘साउनमा ५ सय २७ टन वितरण गरिएको र भदौमा अहिलेसम्म २ सय ५० टन वितरण भइसकेको र अहिले ६३ टन बाँकी रहेको लामाले बताए ।
७ सय ६५ रुपैयाँमा केन्द्रबाट बिक्री हुने मललाई २ सय बढी तिरेर किन्नुपरेको मलंगवा–२ का गगनदेव रायले बताए । उनले भने, ‘भारतबाट ल्याउन पाइँदैन, नेपालमा चर्को मूल्य तिर्नुपरेको छ ।’ समयमै मल पाइएन भने उत्पादनमा कमी आउने डरले पनि महँगोमा खरिद गर्नु परेको उनको गुनासो छ । भन्छन्, ‘सहकारीले पनि २ बोराभन्दा बढी दिँदैन, १ बोरा मल १० देखि १२ कठ्ठामा सकिन्छ । बढी खेत भएका किसानलाई झन् धेरै समस्या छ ।
मलका लागि ४ दिनदेखि धाउँदा पनि मगंलबार मात्र मल पाइएको गम्हरियाका किसान उमेश दासले बताए । ४ दिनपछि पनि ९ सय ५० रुपैयाँ तिरेर दुई बोरा मात्र मल पाएको उनले बताए ।
प्रतिक्रिया दिनुहोस !
