दिल्लीबाट घर फर्किँदै गरेका नेपालीलार्इ भारतीयले लुटे

कञ्चनपुर: भारतको नयाँ दिल्लीबाट फर्कँदै गरेका कञ्चनपुर शुक्लाफाँटा नगरपालिका-११ कलुवापुरका ३६ वर्षीय रमेश तिरुवा भारतमै लुटिएका छन् । बसमा संगै बसेर आएका युवाले दिएको आइसक्रिम खाँदा बेहोस बनेका तिरुवा भारत बरेलीको रामनगर नजिकै लुटिएका हुन् । 

'सँगै बसेका युवाले आइसक्रिम खान दियो, आफूले पनि खायो', पीडित तिरुवाले भने, 'छ महीना काम गरेर कमाएर ल्याएको भारतीय ४० हजार र परिवारका लागि ल्याएको कपडा सबै लुटेराले लुटेर लगेको छ ।' बेहोस अवस्थामै सीमावर्ती बजार बनवासा पुगेपछि नेपालीको सहयोगमा उनी घर पुगेका छन् । 

भारतमा मृत्यु 

कञ्चनपुरकै शुक्लाफाँटा नगरपालिका-६ का करिब २२ वर्षीय रनि साउदको भारत गुडगाँवस्थित रोहतकमा बुधवार सडक दुर्घटनामा मृत्यु भएको छ । सडक पार गर्ने क्रममा गाडीले ठक्कर दिँदा साउदको मृत्यु भएको मृतकका छिमेकी तर्कराज भट्टले जानकारी दिए । 

मृतकको शव रोहतकस्थित सरकारी अस्पतालमा राखिएको छ । शव ल्याउन मृतकका आफन्त भारत गएका छन् । मृतक साउद भारतमा रोजगारी गर्दै आएका थिए । साउदका श्रीमती र दुई छोरा छन् ।