इन्डोनेसिया : एसियाली खेलकुद प्रतियोगिताको १८औं संस्करणमा नेपाली जुडो खेलाडीले पदक जित्ने सम्भावना पनि समाप्त भएको छ । प्रतियोगिताको १४औं दिन शुक्रबार आफ्ना तीन खेलाडी पहिलो खेलमै पराजित भएपछि जुडोमा नेपालको आशा सकिएको हो ।
महिलातर्फ ७८ केजीभन्दा मुनिको तौलसमूहमा नेपालकी पुनम श्रेष्ठ बाई पाएर सीधै क्वार्टरफाइनलमा पुगेकी थिइन् । तर, उनी क्वार्टरफाइनल भिडन्तमा दक्षिण कोरियाली प्रतिद्वन्द्वी पार्क युजिनसँग पराजित हुन पुगिन् । पुनमलाई हराउने कोरियाली खेलाडी युजिन प्रतियोगिताको फाइनलमा पुगेका कारण उनले कांस्य पदकका लागि पुनः खेल्न पाउने अवसर प्राप्त गरिन् ।
कांस्य पदकको सम्भावना जीवित राख्न उनले कजाकस्तानकी खेलाडी रइफोभा जरिनालाई हराउनुपर्ने थियो । तर, उनी उक्त भिडन्तमा जरिनासँग पराजित हुन पुगिन् । यसरी आफूले पाएको दुईवटै अवसरमा चुकेपछि पुनम पदकको होडबाट बाहिरिन पुगिन् ।
यसैगरी शुक्रबार नै भएको पुरुषतर्फको ९० केजीभन्दा मुनिको तौलसमूहमा पनि नेपाली खेलाडी श्रीराम मकाजू आफ्नो पहिलो खेलमै पराजय स्वीकार्न बाध्य भए । श्रीरामलाई प्रिक्वार्टरफाइनल भिडन्तमा ताजकिस्तानका खेलाडी उस्तोपिरियोन कोमरनसोखले हराए ।
अर्का नेपाली खेलाडी रविन श्रेष्ठ पनि आफ्नो पहिलो भिडन्तमै असफल साबित भए । पुरुष एक सय केजीभन्दा मुनिको तौलसमूहमा रविनलाई उज्बेकिस्तानका खेलाडी जुरेभ सेरलीले पराजित गरे । जारी एसियाडमा जुडो गत बुधबारदेखि सुरु भएको हो ।
जुडोको पहिलो दिन भएको खेलमा नेपालका दुवैजना खेलाडी पराजित भएका थिए । पुरुषतर्फको ६६ केजीभन्दा मुनिको तौलसमूहमा नेपालका इन्द्रबहादुर श्रेष्ठ उत्तर कोरियाका खेलाडीसँग र महिलातर्फको ५२ केजीभन्दा मुनिको तौलसमूहमा देविका खड्का जापानी खेलाडी सुनोदा नात्सुमीसँग हारेका थिए ।
यसैगरी दोस्रो दिन बिहीबार पनि तीन नेपाली खेलाडी पराजित भएका थिए । नेपालकी अुनभवी खेलाडी फुपुल्हामु खत्री महिला ६३ केजीभन्दा मुनिको तौलसमूहमा आयोजक राष्ट्र इन्डोनेसियाकी खेलाडी फ्रादिभ्था अर्देलियासँग पराजित भएकी थिइन् । उनी बाई पाएर प्रिक्वार्टरफाइनलमा पुगेकी थिइन् ।
फुपु दक्षिण एसियाली खेलकुद (साग)की पदकधारी खेलाडी हुन् । २१ वर्षीया फुपुले सन् २०१२ मा भारतमा आयोजना भएको १२औं सागमा स्वर्ण पदक जितेकी थिइन् । उनी नेपालका लागि सागमा स्वर्ण पदक जित्ने पहिलो महिला खेलाडी पनि हुन् ।
सोही दिन भएको पुरुष ७३ केजीभन्दा मुनिको तौलसमूहमा सञ्जित डंगोल साउदी अरेबियाका खेलाडी सुलेमान फाहदसँग र महिला ५७ केजीभन्दा मुनिको तौलसमूहमा मनिता प्रधान श्रेष्ठ भियतनामकी खेलाडी थी बिच नेगोकसँग हारेका थिए ।
यसैगरी शुक्रबार भएको पुरुष भलिबलमा नेपालले किर्गिस्तानलाई ३–० को सोझो सेटमा पराजित गर्यो । १५औं र १६औं स्थानको वरीयता निर्धारणका लागि खेलाइएको उक्त खेलमा नेपाली टोली २५–०, २५–०, २५–० अंकले विजयी भयो । जारी एसियाडमा अब नेपालले ट्रायथलनको पुरुष स्पर्धामा शनिबार र मिक्स स्पर्धामा आइतबार प्रतिस्पर्धा गर्न बाँकी छ ।
नेपालले पदकको आशा गरेको कुनै पनि खेलले १८औं एसियाडमा सन्तोषजनक प्रदर्शन गर्न सकेन । एसियाली खेलकुदमा पहिलोपटक समावेश गरिएको प्याराग्लाइडिङले भने नेपाली टोलीलाई रित्तो हात घर फर्कनुपर्ने सम्भावनाबाट जोगाएको छ । नेपाली प्याराग्लाइडिङ टोलीले बुधबार सम्पन्न पुरुष टिम क्रसकन्ट्री स्पर्धामा रजत पदक जितेको थियो ।
नेपालले एसियाली खेलकुदमा जितको यो दोस्रो रजत पदक हो । यसअघि सन् १९९८ मा थाइल्यान्डमा सम्पन्न एसियाली खेलकुदमा तेक्वान्दोकी सबिता राजभण्डारीले पहिलोपटक नेपाललाई रजत पदक दिलाएकी थिइन् ।
प्रतिक्रिया दिनुहोस !
