मुसीकोट : रुकुम(पश्चिम)को बाँफिकोट गाउँपालिकामा खोलामा बगेर श्रीमान श्रीमतीको मृत्यु भएको छ । बाँफिकोट गाउँपालिका ८ दुलि दुलिखाका ५० वर्षीय अमृत घर्ती र उनकी श्रीमती ४८ वर्षीया तुलसा घर्तीको बाँफिकोटको बडगाई खोलामा बगेर मृत्यु भएको हो ।
बाँफिकोट गाउँपालिका–५ बडगाउँमा छोराको माइतबाट फर्कदै गर्दा घर्ती दम्पती बिहीबार बेलुकी उक्त वडाकै ढाँरा भन्ने ठाउँबाट खोलामा बगेका थिए । खोलामा रहेको काँठको पुल तर्ने क्रममा चिप्लिएर बगेका घर्ती दम्पतीमध्ये श्रीमान अमृतको शव शुक्रबार बेलुकी फेला परेको थियो ।
बगेको स्थानभन्दा करिब दुई सय मिटर तल उनको शव फेला परेको इलाका प्रहरी कार्यालय बाँफिकोटले जनाएको छ । त्यस्तै श्रीमती तुलसाको शव भने आज बिहान सात बजेतिर फेला परेको छ । खोजी गरिरहेका स्थानीय र प्रहरीको टोलीले बगेको भन्दा करिब डेडसय मिटर तल शव फेला पारेको वडा नं. ८ का वडा सदस्य भीमबहादुर बाँठाले जानकारी दिए । यो सँगै बाँफिकोट गाउँपालिकामा मात्र यो वर्ष खोला तर्ने क्रममा तीन जनाको मृत्यु भएको छ । भने एक जना अझै बेपत्ता छन् ।
प्रतिक्रिया दिनुहोस !
