को हो हेडसर ?

सिरहा : लहान नगरपालिकाका दुई विद्यालयमा प्रधानाध्यापक (हेडसर) बन्न होडबाजी चलेको छ । वडा नम्बर ७ को पशुपति मावि र १७ को श्री मावि झिरहरीमा शिक्षकबीच प्रधानाध्यापक बन्न होडबाजी चलेको हो । यसले गर्दा प्रधानाध्यापक को हो भन्ने नै अन्योल देखिएको छ ।

पशुपतिमा तत्कालीन प्रधानाध्यापक प्रमेश्वर रायलाई आर्थिक हिनामिना गरेको आरोपमा शिक्षा विकास तथा समन्वय इकाइले हटाएको थियो । त्यसपछि तीन शिक्षक प्रधानाध्यापक बन्ने दौडमा छन् । श्री माविको प्रधानाध्यापकमा दुई जना शिक्षकको दाबी छ ।

रायलाई गत असार २१ गते हटाइएको थियो । रायलाई थमाइएको पत्रमा दोस्रो वरीयतामा रहेका शिक्षकलाई निमित्तको जिम्मेवारी दिनुपर्ने उल्लेख छ । तर, रायले ‘कनिष्ठ’ शिक्षक सोभित चौधरीलाई गत असार २२ गते निमित्तको जिम्मेवारी दिए । त्यसपछि शिक्षक रामकुमार साह मेयर र अरुण गिरी अदालतको शरणमा पुगेका थिए ।

नगरपालिकाले पनि अधिकार क्षेत्रबाहिर गएर चौथो तहका शिक्षक साहलाई निमित्तको जिम्मेवारी दियो । त्यसपछि दोस्रो वरीयतामा रहेका शिक्षक गिरी आफू अन्यायमा परेको भन्दै उच्च अदालत जनकपुर पुगे । मेयरले लेखेको पत्र स्थानीय तहको काम, कर्तव्य, अधिकारभित्र नपरेको भन्दै लागू नगर्न साउन ३२ गते अदालतले आदेश दिएको थियो ।

तर, मेयरले फेरि साहलाई नै अर्को पत्र दिएका छन् । ‘अदालतले भदौ २० गते तारेख तोकेको छ’, शिक्षक गिरीले भने, ‘त्यसपछि मुद्दाको अन्तिम किनारा लाग्छ ।’ यस विद्यालयमा सात जना द्वितीय श्रेणीका शिक्षक छन् ।

श्री मावि झिरहरीमा पनि शिक्षकद्वय अब्दुल अजिज र नारायण साहले आफु प्रधानाध्यापक रहेको दाबी गर्दै आएका छन् । तत्कालीन जिल्ला शिक्षा कार्यालयले अजिज र साहसहित चार जनालाई गत माघ १२ गते सरुवा गरेको थियो । जिल्ला शिक्षा समितिको निर्णयअनुसार अजिजलाई झिरहरीबाट पशुपति मावि, साहलाई बस्तीपुर माविबाट झिरहरी, हरिनारायण चौधरीलाई सगरमाथा मावि ढोढनाबाट बस्तीपुर र राजेन्द्रप्रसाद यादवलाई पशुपतिबाट सगरमाथा माविमा सरुवा गरिएको थियो ।

अजिजले शिक्षा ऐन (नवौं संशोधन) विपरीत सरुवा गरेको भन्दै उच्च अदालत जनकपुरको राजविराज इजलासमा वैशाख ४ गते मुद्दा दर्ता गराएका थिए । अदालतले वैशाख ५ गते उनको सरुवा तत्काल कार्यान्वयन नगराउन र लिखित जवाफ पेस गर्न भनी शिक्षा कार्यालयको नाममा परमादेश जारी गरेको थियो ।

अजिजका कारण झिरहरीमा सामाजिक तथा शैक्षिक वातावरण बिग्रिन गएकाले उनलाई सरुवा गरिएको निमित्त जिल्ला शिक्षा अधिकारी देवन चौधरीले पेस गरेको लिखित जवाफमा उल्लेख छ । विद्यालय व्यवस्थापन समितिको सहमतिमा काज सरुवा गरिएको पनि जवाफमा छ । लहान नगरपालिकाले फागुन ६ गते शिक्षक नारायण साहलाई काज फिर्ता गरेको पत्र थमाएको थियो । नगरपालिकाले अधिकारबाहिर गएर निर्देशन दिएको भन्दै साहले पनि उच्च अदालत जनकपुरको राजविराज इजलासमा रिट दायर गरेका थिए । शिक्षक साहलाई रिट निवेदन टुंगो नलागेसम्म झिरहरी विद्यालयमा कार्य गर्न अदालतले पनि अन्तरिम आदेश जारी गरेको थियो ।

शिक्षा विकास तथा समन्वय इकाइ सिरहा प्रमुख डोलराज पाण्डेका अनुसार अदालतबाट अन्तिम टुंगो नलागेसम्म प्रधानाध्यापक को हो भनेर यकिन गर्न मिल्दैन । ‘म यहाँ सरुवा भएर आएको केही दिन भएको छ’, उनले भने, ‘विवादको विषयमा बुझ्दै छु ।’

सर्टिफिकेट वितरणले विवाद

श्री मावि झिरहरीमा एसइईका विद्यार्थीको सर्टिफिकेट वितरणले विवाद बढ्दै गएको छ । शिक्षक साहले आफू प्रधानाध्यापक भनेर सर्टिफिकेट वितरण गर्दै छने भने शिक्षक अजिज आफू प्रधानाध्यापक हो भन्दै छन् । यो विषयमा वडाध्यक्ष प्रथमलाल चौधरीलगायत र शिक्षकबीच चर्काचर्की भएको पाइएको छ । वडाध्यक्षले अपशब्द प्रयोग गरेको भन्दै शिक्षकले विद्यालय तीन दिन बन्द गर्ने निर्णय गरेका थिए । त्यसपछि पढाइ अवरुद्ध भएको भन्दै १३ गते विद्यार्थीले शिक्षकलाई विद्यालयमै पाँच घण्टा थुनेका थिए । स्थानीय प्रहरी– प्रशासनको रोहबरमा विद्यार्थीले पढाइ नियमित गर्ने सर्तमा ताला खोलेका थिए ।