राजविराज : अर्थमन्त्री डा. युवराज खतिवडाले करको विषयमा चलेको फेसबुके हल्लाको पछि नलाग्न आग्रह गर्दै आमनागरिकलाई भार नपर्ने गरी कर लगाइने बताएका छन् । राजविराजमा करदाता सेवा कार्यालयको उद्घाटन गर्दै खतिवडाले जनताले स्थानीय, प्रदेश वा संघीय सरकारमध्ये एक ठाउँमा कर तिरे पुग्ने पनि बताए ।
दोहोरो तथा अधिकार क्षेत्र बाहिर गएर कर नलगाउन निर्देशन दिइरहेको भन्दै उनले पहिलो पटक संघीय ढंगले कर लागेकाले केही अन्यौल देखिएको स्विकारे ।
यो अन्यौल चाँडै हट्ने बताएका उनले उत्पादन गर्दा नलागे पनि बजारमा लगेर कारोबार गर्नेले कर तिर्नुपर्ने बताए । एउटाले गर्दा स्थानीय सबैलाई तिराउन नमिल्ने बताउँदै उनले सधैँ विदेशी ऋणमा निर्भर भएर विकास सम्भव नहुने दाबीसमेत गरे ।
सरकारले आधारभूत सेवाहरु कर संकलन गरेर नै पुरा गर्ने भएकाले करको विषयलाई अनावश्यक रुपमा लिन नहुने धारणा राख्दै उनले मुलुकको ढुकुटी बलियो नभएसम्म विकास असम्भव रहेको बताए ।
‘करको दायराभन्दा दरमा भइरहेको फेसबुके हल्ला बढी भएको छ’, उनले थपे, ‘तर यथार्थ भने त्यस्तो होइन, उठाइएका करको पूर्ण सदुपयोग हुन्छ र प्रदेश तथा स्थानीय तहमै खर्च हुन्छ ।’
बित्तीय स्रोत व्यवस्थापन र परिचालन गर्न सक्ने स्थानीय सरकारको अधिकारअन्तर्गत कर नीतिमा हेरफेर गरेकाले करको दुरुपयोग नहोस भन्नेमा चनाखो रहनुपर्ने उनले बताए ।
पूर्व–पश्चिम रेलमार्ग अघि बढ्ने
मन्त्री खतिवडाले पूर्व–पश्चिम रेलमार्ग निर्माणका लागि भारतसँग सम्झौताको काम अगाडि बढेको जानकारी दिए । भारत भएर जनकपुर आउने रेल काँकडभिट्टाबाट बर्दिबास हुँदै हेटौंडासम्म पुर्याउने महत्वपूर्ण योजनाका साथ सरकार अघि बढेको उनले बताए ।
तराई–मधेसको भौतिक पूर्वाधार, आर्थिक एवम् सामाजिक रुपान्तरणका लागि अत्यधिक बजेट केन्द्रित गरेकाले सदुपयोगमा ध्यान दिन उनले जोड दिए । तीनै तह मिलेर काम गर्नुपर्नेमा जोड दिँदै मन्त्री खतिवडाले अधिकारसम्पन्न सरकारले सानातिना विकासमा संघको मुख ताकेर दोष पन्छाउन नमिल्ने बताए । यसैगरी पैसाभन्दा निर्माण प्रकृयाको कार्यान्वयनमा समस्या रहेको हुलाकी सडकको काम सरकार स्वयम्ले पूरा गर्ने उनले बताए ।
उद्योगीको पत्र मन्त्रीलाई
यस्तै सप्तरी उद्योग वाणिज्य संघले अर्थमन्त्री खतिवडालाई १० बुँदे अवधारणा पत्र बुझाएको छ । मन्त्रीको सम्मानमा आयोजित स्वागत कार्यक्रममा संघका अध्यक्ष अरुण प्रधानले जिल्लाको समग्र विकास निर्माणमा देखिएको समस्या र समाधानबारे अवधारणा पत्र बुझाए ।
कार्यक्रममा प्रदेश सभा सदस्य मनीष सुमन, उद्योग वाणिज्य संघका उपाध्यक्ष किशोर प्रधान, राजस्व सचिव शिशिर ढुंगाना र प्रमुख जिल्ला अधिकारी सुरेन्द्र पौडेललगायतकाले मन्तव्य राखे । यसअघि मन्त्री खतिवडाले गजेन्द्रनारायण सिंह औधोगिक क्षेत्रको निरीक्षण गरेका थिए ।
प्रतिक्रिया दिनुहोस !
