मुसिकोट : रुकुम पश्चिमको चौरजहारी नगरपालिकामा पर्ने जहारीखोलामा पुल नहुँदा वारपार गर्न समस्या भएको छ । नगरपालिका–२ विजयश्वरी र वडा नम्बर ७ र ८ को अंगेरी जोड्ने झोलुंगेपुल नहुँदा वर्षायाममा विद्यार्थीको पढाइसमेत प्रभावित हुने गरेको छ ।
कोटजहारीदेखि चौरजहारीसम्म जाने कक्षा ५ देखि स्नातक तहका करिब एक सय ५० जना विद्यार्थीको बर्सेनि यो समस्या झेल्दै आएका छन् । साविकको कोटजहारी गाविसमा पर्ने उक्त वडाबाट उच्च शिक्षाका लागि चौरजहारीस्थित शीतल माध्यमिक विद्यालय र शीतल क्याम्पसमा पुग्ने गरेका छन् । वडा नम्बर ७ को कुमाइँगाउँ, काप्रा, वडा नम्बर ८ को सोतीखोला, बसीगाउँ, बडाखोला, सोतीगेष्मा र वडा नम्बर ९ को गुर्तालगाउँ र कोटगाउँका विद्यार्थीलाई बढी समस्या हुने गरेको कक्षा १० मा अध्ययनरत दीपक गौतमको भनाइ छ ।
करिब २ देखि ३ घण्टाको पैदल दूरीमा अवस्थित विद्यालय तथा क्याम्पसमा अध्ययन गर्ने विद्यार्थीले जोखिम मोलेर खोला तर्नुपर्ने बाध्यता छ । बाढी आएका बेला जहारीखोला तर्न नसकेर कक्षासमेत छुट्ने गरेको विद्यार्थी शिविका बुढाले बताइन् । कतिपय अवस्थामा खोला तर्ने क्रममा शैक्षिक सामग्रीसमेत खोलाले बगाउने गरेको उनको भनाइ छ ।
चौरजहारीमा खुला विद्यालय प्राविधिक धारअन्तर्गत सिभिल इन्जिनियर, प्लस टु र बीएडसम्मको शिक्षा हासिल गर्न विद्यार्थी जाने गरेका छन् । विजयश्वरी र अंगेरी जोडने पुलका लागि पटक–पटक सर्भे हुँदासमेत निर्माण हुन सकेको छैन । पुल नहुँदा आसपासका किसानसमेत जोखिम मोलेर खोला तर्न बाध्य छन् । खेतमा गोडमेल तथा मलजल गर्ने समयमा खोलामा बाढी आउँदा कृषक जोखिम मोलेर खोला तर्नुपर्ने बाध्यता रहेको स्थानीय बताउँछन् ।
प्रतिक्रिया दिनुहोस !
