तोक्यो : जापानमा गएको करिब २५ वर्षपछिकै ठूलो आँधी आएको छ । आँधीका कारण जापानमा ठूलो क्षति पुगेको बताइएको छ । ‘जेबी’ नाम दिइएको उक्त आँधी प्रतिघण्टा २१६ किलोमिटरको गतिमा आएको मौसमविद्ले जनाएका छन् । भीषण वर्षासहितको आँधीको प्रकोपका कारण पश्चिमी जापानका कतिपय ठाउँमा पहिरो पनि गएको अधिकारीले जनाएका छन् ।
यसको प्रकोपले लाखौँ मानिस प्रभावित भएको अनुमान गरिएको छ । यद्यपि यसबाट भएको क्षतिको यकिन विवरण प्राप्त भएको छैन । जापानी प्रधानमन्त्री सिन्जो आबेले उद्धार कार्यमा खट्न सबैलाई आग्रह गरेका छन् । उनले सतर्कता अपनाउन नागरिकलाई अपिल गरेको जापानी सरकारी टेलिभिजन एनएचकेले जनाएको छ ।
जापानको मौसम विभागले बाढी पहिरो र खतरनाक हावाहुरीको सम्भावना अझै रहेकाले आवश्यक सतर्कता अपनाउन सूचना सार्वजनिक गरेको छ । जापानको मौसम विभागका अधिकारी रियुता कुरुराले भने, ‘सोमबार साँझबाट शुरु भएको आँधीको प्रकोप २५ वर्षपछिकै शक्तिशाली छ ।
यसले पुर्याउन सक्ने क्षतिको आँकलन गरी सरकारले आवश्यक सुरक्षात्मक उपाय अपनाउनु पर्छ ।’ उनले मंगलबार बिहानदेखि आँधीको गति झनै बढ्दै गएको देखिएको जानकारी दिएका छन् । कैयौँ स्थानमा पहिरो गएको र केहीमा बाढीले क्षति पुर्याएको देखिएको उनले जानकारी दिए । क्षति भएका ठाउँमा अहिले नै स्थलगत रूपमा जान सकिने अवस्था नरहेको पनि उनले स्पष्ट पारे ।
प्रधानमन्त्री आबेले मन्त्रिपरिषद्को आपत्कालीन बैठक बोलाएका छन् । यो बैठकले सुरक्षात्मक उपायका लागि आवश्यक तयारी गर्न निर्देशन दिने बताइएको छ । मौसमविद्हरूले सन् १९९३ पछिकै सबैभन्दा शक्तिशाली आँधी आएको भन्दै सबै नागरिकलाई अनावश्यक रूपमा बाहिर ननिस्किन र सरकारी सूचना पालन गर्न आग्रह गरेका छन् । रासस/एएफपी
प्रतिक्रिया दिनुहोस !
