राजविराज : सप्तरीबाट सुपारी, स्याउ र गाजा तस्करी हुँदै आएकोमा पछिल्लो पटक खाने मटर दानासमेत सप्तरी हुँदै भारततर्फ तस्करी भइरहेको खुलेको छ ।
दुई दिनको अवधिमा प्रहरीले भन्सार छली नेपालबाट भारततर्फ लैजान लागिएको ४१ क्विन्टल २५ किलो मटर बरामद गरेसँगै यस्तो तथ्य खुलेको हो । तस्करीमा प्रहरीकै संलग्नताका कारण यसअघि मटर बरामद हुन नसकेको सप्तरी प्रहरीले जनाएको छ । सिमास्थित चौकीमा कार्यरत प्रहरी सहायक निरीक्षकसहितका प्रहरीहरूलाई सो स्थानबाट स्थानान्तरण गरी प्रहरीको नयाँ टोलीलाई पठाए पछि तस्करी हुने गरेको मटर बरामद भएको एसपी राजेन्द्र विष्टले बताए ।
नाकाबाट ठूलो परिमाणमा तस्करी भइरहेको गोप्य सूचना पाएपछि एसपी विष्टले त्यहाँ कार्यरत प्रहरी इन्चार्जलाई कडाई गर्न निर्देशन दिएका थिए । तै पनि तस्करीका समानहरू बरामद नभएपछि उनले प्रहरी टोली नै परिवर्तन गरे ।
प्रहरीले हनुमाननगर कंकालिनी नगरपालिका १४ रामपुरा मल्हनिया चौकस्थित प्रभु नायकको घरमा लुकाई छिपाई राखिएको २१ क्विन्टल २५ के.जी. मटर बरामद गरेको छ । भन्सार छली नेपालबाट भारततर्फ लैजाने उदेश्यले राखिएको ६४ हजार मूल्य बराबरको खाने मटर बरामद भएको एसपी राजेन्द्र विष्टले बताए ।
यसैगरी तिलाठी कोइलाडी गाउँपालिका ५ बाट प्रहरीले टेम्पोमा भारततर्फ लैजाँदै गरिएको ४० बोरा मटर बरामद गरेको छ । भन्सार छली अवैध रुपमा भारततर्फ लैजाँदै गरेको स. १ ह २५९० नम्बरको सिटी सफारीबाट २० वटा बोरामा पाँच क्विन्टल र स.१ ह १८४८ नम्बरको टेम्पोबाट २० वटा बोरामा पाँच क्विन्टल गरी १० क्विन्टल मटर बरामद गरिएको हो ।
ईलाका प्रहरी कार्यालय हनुमाननगरबाट सई बलबहादुर खत्रीको नेतृत्वमा खटिएको गस्ति टोलीले नेपालबाट भन्सार छली अवैध रुपमा भारततर्फ लैजाँदै गरेको खाने मटर बरामद गरेको जनाइएको छ । बरामद गरिएको मटरलाई आवश्यक कारबाहीका लागि राजबिराज भन्सार कार्यालय तिलाठीमा बुझाईएको छ ।
राजविराजबाट दशगजा क्षेत्रमा भण्डारण गरी तस्करीका समान टेम्पो, रिक्सा, साइकल, मोटरसाइकलमा राखेर कुनौली नाका कटाइने गरिन्छ । सिमा क्षेत्रको तिलाठी, कुनौलीमा भण्डारण गरिने अवैध समानहरू प्रायः रातको समयमा तस्करी गर्ने गरिएको पाइएको छ ।
स्थानीयवासीका अनुसार तस्करहरूले कुनौली नाकामा प्रहरीसित सेटिङ मिलाएका हुन्छन् । नाका कटाएबापत तस्करका भरियाहरूले प्रति कार्टुन वा प्रति बोरा ३० रुपैयाँका दरले रकम पाउँछन् । अवैध समानहरू भारततिर लगिँदा पनि सिमामा खटिएका प्रहरीले नदेखेझै गर्ने र अवैध समानहरू बरामद भएपनि आरोपितहरू पक्राउ पर्ने गरेका छैनन् ।
प्रतिक्रिया दिनुहोस !
