काठमाडौँ : वरिष्ठ स्त्री तथा प्रसुति रोग विशेषज्ञ डाक्टर भोला रिजालले आफ्नो ओम अस्पताल छाडेका छन् । ओम अस्पतालको व्यवस्थापनको नेतृत्वमा चलचित्र निर्माता तथा गोपीकृष्ण हलका मालिक उद्धव पौडेल प्रवेश गरेसँगै रिजाल बाहिरिएका हुन् ।
ओमबाट बाहिरिएपछि रिजाल नेपाल मेडिकल कलेज शिक्षण अस्पताल (एनएमसी) अत्तरखेलमा जोडिएका छन् । उनले अब आफ्नो सबै नियमित स्वास्थ्य सेवा एनएमसीबाटै दिने भएका छन् ।
गरिब तथा विपन्न नागरिकलाई सस्तो र गुणस्तरीय स्वास्थ्य सेवाका लागि पुरा समय अब नेपाल मेडिकल कलेजबाट दिने जानकारी रिजालले दिएका छन् । ‘मैले आफ्नो सेवालाई एनएमसीबाट नियमित गर्ने निर्णय लिएको छु’, रिजालले भने, ‘यसबाट बिरामीमा पर्न गएको केही असुविधाप्रति क्षमा चाहान्छु ।’
आगामी सोमबारदेखि हप्ताको ६ दिन रिजालले शिक्षण अस्पताल जोरपाटीबाट नियमित स्वास्थ्य सेवा दिने भएका छन् । ‘मेरो नियमित सेवा आगामी सोमबारदेखि एनएमसीबाट सुरु हुने छ । गरिब र बिपन्न बिरामीलाई सहजरुपमा स्वास्थ्य सेवा दिने मेरो पहिलो लक्ष्य हुने छ’, उनले भने ।
रिजालले आफ्ना नियमित सेवाग्राहीलाई नेपाल मेडिकल कलेजमै आउन आग्रह गरेका छन् । नेपाल मेडिकल कलेज जोरपाटीमा रिजालले दिउसो १ देखि ४ बजेसम्म बिरामी हेर्ने तालिका बनाइएको छ । ।
ओममा उद्धव
चाबहिलस्थित ओम हस्पिटल एण्ड रिसर्च सेन्टर प्रा.लि (ओम अस्पताल) को सञ्चालक समितिको भदौ २० मा बसेको बैठकले अस्पतालका सञ्चालक उद्धव पौडेललाई अध्यक्ष पदमा सर्वसम्मत चयन गरेको थियो ।
अस्पतालको स्थापनाकालदेखि सञ्चालक समितिमा रहँदै आएका पौडेल चलचित्र हलका मालिक तथा चलचित्र निर्माता पनि हुन् ।
ओम अस्पताल
ओम अस्पताल तथा अनुसन्धान केन्द्र स्त्री तथा प्रसुति रोगको उपचारमा ख्याती कमाएको अस्पताल हो । यसले टेष्ट ट्युब बच्चाको सेवा सुरू गरेपछि झन् बढी चर्चित बनेको थियो।
यो अस्पताल र यहाँ टेस्ट ट्यूब बेबीको सुरूवात रिजालकै नेतृत्वमा भएको थियो । यो अस्पताल नेपालमा टेष्ट ट्युब बच्चा सफलरूपमा जन्माउने पहिलो अस्पताल हो। ओम अस्पतालको स्थापना ८ बेड र ३ जना डाक्टरका साथ बि.सं २०४७ मा ओम नर्सिङ होमको नाममा खुलेको थियो ।
प्रतिक्रिया दिनुहोस !
