कुश्मा : सामाजिक सुरक्षा भत्ता पाउने वृद्धवृद्धा, एकल महिला, अपांगता भएका तथा दलितका लागि बैंकले घरघरमा पुगेर खाता खोलिरहेको छ । पर्वत जिल्लाको महाशिला गाउँपालिका सबैजसो वडाका वृद्धवृद्धालाई घरमै पुगेर भत्ता वितरण गर्न खाता खोल्न थालिएको छ । डेढ दशकपछि स्थानीय लुंखुदेउरालीमा पुनस्र्थापना भएको राष्ट्रिय वाणिज्य बैंकले सामाजिक सुरक्षा भत्ता पाउनेको खाता खोल्ने उद्देश्यले घरदैलो अभियान सञ्चालन गरेको छ ।
यस अघि बैंकको पहुँच नहुँदा जनप्रतिनिधि र कर्मचारीले सदरमुकाम कुश्माबजारबाट रकम लगेर वितरण गर्दै आएका थिए ।
बैंकको स्थापनासँगै अब उक्त गाउँपालिकाका वृद्धवृद्धाले पनि बैंकबाटै भत्ता पाउने भएका हुन् । जिल्लाका अन्य स्थानीय तहमा लामो समयदेखि बंंैंकबाट भत्ता वितरण हुँदै आएको भए पनि यो गाउँपालिकामा भने गत आर्थिक वर्षसम्म साविक वडा कार्यालयबाटै वितरण भएको थियो ।
सामाजिक सुरक्षा भत्ता पाउने वृद्धवृद्धा, एकल महिला, अपांगता भएका तथा दलित ज्येष्ठ नागरिकका लागि एकातिर बैंकले खाता खोलिरहेको छ भने अर्कोतर्फ जनप्रतिनिधि र गाउँपालिकाका कर्मचारीले भत्ता वितरण गर्ने काम भइरहेको महाशिला गाउँपालिकाका प्रवक्ता जीवनबिक्रम उच्चैले जानकारी दिए ।
उनका अनुसार ज्येष्ठ नागरिकलाई वडा कार्यालय वा बैंकसम्म पुग्ने झण्झट पनि नहुने र बैंकलाई पनि घरमै पुगेपछि सबै विवरण लिन सकिने भएपछि दुवै पक्षलाई सहज भएको छ ।
अहिले वडा नं. ४ को पाखापानीदेखि अभियान थालिएको प्रवक्ता उच्चैले बताए । गाउँपालिकाका ६ वटै वडामा १५ दिनसम्म यो अभियान थालेर सबै लाभग्राहीलाई भत्ता वितरण गरिने भएको छ भने बैंकले पनि सबैको खाता खोल्ने छ । यसपटक घरदैलो नै गएर खाता खोलिने र अर्को किस्तादेखि सबैलाई बैंक खातामै रकम जम्मा गरिने महाशिला गाउँपालिकाका अध्यक्ष राजु पौडेलले जानकारी दिए । ‘बैंकबाट सामाजिक सुरक्षा भत्ता वितरण हुन थालेपछि पारदर्शिता अझै हुनेछ’, अध्यक्ष पौडेलले भने ।
यस अघि वडा नं. ६ फलामखानीको मुक्तिनाथ विकास बैंकमार्फत भत्ता वितरण हँुदै आएको थियो भने वडा नंं १ हो श्राङदीको गरिमा विकास बैंकबाट वितरण हुँदै आएको थियो । बाँकी चारवटामा यो अभियानमा खाता खोलिने छ र सबै लाभग्राहीका खाता सञ्चालन भइसकेपछि ६ वटै वडालाई एकीकृत रूपमा वाणिज्य बैंकबाटै सामाजिक सुरक्षा भत्ता वितरण गरिने पौडेलले जानकारी दिए ।
महाशिला गाउँपालिकाका ६ वटै वडामा गरी वृद्धवृद्धा, एकल महिला, अपांगतालगायत गरी सामाजिक सुरक्षा भत्ता पाउनेको संख्या एक हजार पाँच सयभन्दा बढी रहेको छ । बैैंकिङ प्रणालीमार्फत रकम वितरण गर्दा सुरक्षित र पारदर्शी हुने बैंकले जनाएको छ ।
प्रतिक्रिया दिनुहोस !
