जाजरकोट : जाजरकोटको बारेकोट गाउँपालिकामा खाद्यसंकट देखिएको छ । असिनापानीले हिउँदेबाली नष्ट गरिदिएको, खाद्य डिपोमा चामल नभएको र बाटो बिग्रिएकाले खाद्यान्न ढुवानी हुन नसकेपछि खाद्यसंकट भएको हो ।
गाउँपालिकामा किनेर खाने अन्नसमेत पाइन छाडेपछि स्थानीय चरम खाद्यसंकटको चपेटामा परेका छन् । साविकका सक्ला, नायकवाडा, रामीडाँडा र रोकायगाउँ गाविसका बासिन्दा खाद्य अभावको चपेटामा परेका छन् । बाढीपहिरोले बारेकोट जाने बाटो अवरुद्ध गरिदिएपछि व्यापारीले दुई महिनादेखि खाद्यान्न ढुवानी गर्न पाएका छैनन् ।
गाउँमा भएको अन्न सकिएको र थप खाद्यान्न ढुवानी नभएपछि स्थानीय भोकै पर्ने अवस्था आएको बारेकोट–२ लिम्साका राजेन्द्र रोकायले बताए । उनले भने, ‘असिनापानीले हिउँदेबाली उत्पादन भएन । बाटो अवरुद्ध नहुँदासम्म निजी क्षेत्रका व्यापारीले पनि बिक्रीका लागि खाद्यान्न लैजान्थे । खाद्य संस्थानको खाद्य डिपोमा पनि खाद्यान्न थियो तर अहिले न किनेर खाने अन्न पाइन्छ । न घरमै छ । नयाँ बाली पाकेको छैन । साह्रै समस्या भयो ।’
गाउँपालिकामा किनेर खाने अन्नसमेत पाइन छाडेपछि स्थानीय चरम खाद्यसंकटको चपेटामा परेका हुन् ।
चामल नभएपछि खाद्य डिपो बन्द छ । डिपो इन्चार्ज रुद्रबहादुर देवकोटा पनि चामल नभएपछि डिपो बन्द गरेर दुई साताअघि घरतिर हिँडेका छन् । संस्थानले बारेकोटस्थित नायकवाडा खाद्य डिपोमा चालु आवमा दुई हजार क्विन्टल चामल ढुवानीका लागी टेण्डर आह्वान गरेको छ । तर, टेण्डर स्वीकृतिका लागि प्रक्रिया पुर्याउन समय लाग्ने भन्दै जिल्ला खाद्य व्यवस्था समितिकोे बैठकले तत्काल १२ सय क्विन्टल चामल बिनाटेण्डर ढुवानी गरी खाद्यसंकट टार्न सरकारलाई आग्रह गर्ने निर्णय गरेको छ ।
प्रमुख जिल्ला अधिकारी ललित बस्नेतको अध्यक्षतामा बसेको बैठकले बारेकोटमा भएको खाद्यसंकट टार्न तत्काल चामल ढुवानी गर्न खाद्य संस्थानको केन्द्रीय कार्यालय काठमाडौं, आपूर्ति विभाग र मन्त्रालयलाई आग्रह गर्ने निर्णय गरेर पठाए पनि सुनुवाइ नभएको गाउँपालिका अध्यक्ष महेन्द्र शाहले बताए । हिउँदमा परेको असिनापानीले किसानको बीउसमेत नरहने गरी अन्नबाली नष्ट भएपछि त्यहाँ संकट परेको उनको भनाइ छ । गरिबीका कारण अधिकांशले किनेर खान सक्ने अवस्था पनि छैन । सहुलियत दरको चामल ढुवानीमा पनि ढिलासुस्ती हुँदा स्थानीय निकै मर्कामा परेका छन् ।
केही व्यापारीसँग स्टक रहेको चामलको मूल्य पनि दोब्बर बढेको छ । ४० रुपैयाँमा पाइने मोटो चामल ८० रुपैयाँ पुगेको स्थानीय शिक्षक कालीप्रसाद थापाले बताए । उनका अनुसार केही दिनअघि महँगोमा किन्न पाइने त्यही चामल पनि पाइन छाडेको छ । ‘केही दिनमा बारेकोटमा खाद्यान्न पुर्याइएन भने चरम संकट पर्छ । गाउँले भोकभोकै मर्ने अवस्था आउँछ’, उनले भने, ‘सडक यातायात नपुगेको सो गाउँपालिकामा घोडा, खच्चडसमेत हिँड्न नमिल्ने गरी बाटो अवरुद्ध भएपछि समस्या परेको हो । यो गाउँपालिका जुम्ला र डोल्पासँग सिमाना जोडिएको छ ।’
प्रतिक्रिया दिनुहोस !
