ब्युनस आयर्स : अर्जेन्टिनी महान् फुटबलर डिएगो म्याराडोनाले मेक्सिकन क्लबको प्रशिक्षक पद सम्हालेका छन् । मंगलबारदेखि मेक्सिकोको फुटबल क्लब डोराडस डे सिनालोआको प्रशिक्षक बनेका म्याराडोनाले पत्रकार सम्मेलनमा आफ्नो प्रशिक्षणमा क्लबले लिगसहित थुप्रै उपाधि जित्ने दाबी गरे ।
सञ्चारकर्मीले उनीमाथि यसअघि लाग्दै आएको लागुपदार्थ दुव्र्यसनी र अराजक छविबारे जिज्ञासासमेत राखेका थिए । तर, म्याराडोनाले विगतको कुरा कोट्याउनु कसैका लागि पनि राम्रो नहुने भन्दै जवाफ दिएका थिए ।
‘विगतमा के भयो । के गरियो गौण नै राखौं । मैले जीवनमा धेरै राम्रो काम पनि गरेको छु । मबाट कतिपय गल्ती पनि भए होला । तर, विगत कोट्याउनु राम्रो हुन्न,’ ५७ वर्षीय म्याराडोनाले भने । डोराडस मेक्सिकोको दोस्रो डिभिजनको क्लब हो । म्याराडोना अर्जेन्टिनालाई विश्वकपको उपाधि जिताउने टोलीका महत्वपूर्ण सदस्य हुन् ।
उनले सन् १९७७ देखि सन् १९९४ सम्म अर्जेन्टिनाका लागि ९१ वटा अन्तर्राष्ट्रिय प्रतियोगिता खेलेका थिए । यसैगरी उनी अर्जेन्टिनी राष्ट्रिय टोलीका पूर्वप्रशिक्षक पनि हुन् । उनले सन् २००८ देखि सन् २०१० सम्म अर्जेन्टिनी टोलीको प्रशिक्षकको भूमिका निर्वाह गरेका थिए । पछिल्लोपटक उनले संयुक्त अरब इमिरेट्सको क्लब अल फुजाइरहमा प्रशिक्षकको जिम्मेवारी निर्वाह गरेका थिए । उक्त क्लबसँग उनको सम्झौता गत अप्रिलमा सकिएको थियो । मेक्सिकन क्लब डोराडसले अघिल्लो साता मात्र प्रशिक्षक फ्रान्सिस्को गामेजलाई पदबाट हटाएको थियो ।
गामेजलाई हटाएको एक दिनपछि नै डोराडसले म्याराडोनालाई प्रशिक्षकका रूपमा भित्याउने निर्णय सार्वजनिक गरेको थियो । म्याराडोनाले अर्जेन्टिनोस जुनियर्स, बोका जुनियर्स, स्पेनिस क्लब बार्सिलोना र इटालियन क्लब नापोलीलगायतबाट व्यावसायिक फुटबल पनि खेलेका थिए । देशका लागि सन् १९८६ मा विश्वकप जितेका म्याराडोनाले सन् २०१० को विश्वकपमा भने अर्जेन्टिनी टोलीको प्रशिक्षकको भूमिका निर्वाह गरेका थिए ।
प्रतिक्रिया दिनुहोस !
