पोखरा : राष्ट्रिय महिला भलिबल प्रतियोगिताको उपाधिका लागि चिरपरिचित प्रतिद्वन्द्वी न्यु डायमन्ड एकेडेमी र विभागीय टोली एपीएफ क्लबबीच प्रतिस्पर्धा हुने भएको छ । मंगलबार भएको पहिलो सेमिफाइनलमा न्यु डायमन्डले चितवन टाइगर्सलाई ३-० को सोझो सेटमा पराजित गर्यो । प्रतिभा मालीको उत्कृष्ट प्रदर्शनमा न्यु डायमन्डले विदेशी खेलाडी सम्मिलित चितवनलाई पहिलो सेटमा २५-१८ को जित निकाल्यो ।
न्यु डायमन्डले दोस्रो सेटमा १७-२२ ले पछि परेको अवस्थालाई उल्टाउँदै २५-२३ को संघर्षपूर्ण जित निकाल्न सफल भयो । दोस्रो सेटमा पुनरागमन गरे पनि जित निकाल्न नसकेको चितवन टाइर्गस् अन्तिम सेटमा २५-१७ ले पराजित भयो । इन्द्रराज्यलक्ष्मी माविको भलिबल कोर्टमा भएको दोस्रो सेमिफाइनल खेलमा त्रिभुवन आर्मी क्लबलाई पराजित गर्दै एपीएफले उपाधिका लागि न्यु डायमन्डसँगको भेट पक्का गर्यो ।
एपीएफले आर्मीलाई पहिलो सेटमा २५-२२, दोस्रो सेटमा २५-२० र तेस्रो सेटमा २५-२१ ले पराजित गर्यो । एपीएफको जितमा सरस्वती चौधरीले उत्कृष्ट प्रदर्शन गरिन् । बुधवार तेस्रो स्थानका लागि आर्मी र चितवन तथा फाइनल खेल न्यु डायमन्ड र एपीएफ क्लबबीच हुनेछ ।
तीज महोत्सवका अवसरमा नवआदर्श सामुदायिक विकास समाजको आयोजनामा जारी प्रतियोगिताको विजेताले एक लाख र उपविजेताले ६५ हजार रुपैयाँसहित पाउनेछन् । प्रतियोगितामा पाँच टोली सहभागी छन् ।
प्रतिक्रिया दिनुहोस !
