काठमाडौं : भारतीय क्रिकेट कन्ट्रोल बोर्ड (बीसीसीआई) को निमन्त्रणामा एकिदवसीय क्रिकेट खेल्न गएको नेपालको यू-१९ टोली पहिलो खेलमा पराजित भएको छ । बुधबार भारतको राष्ट्रिय एकेडेमी टोली ‘इन्डिया यू-१९ बी'सँग प्रतिस्पर्धा गरेको नेपालको यू-१९ टोली ४० रनले पराजित भएको हो ।
एकाना अन्तराष्ट्रिय क्रिकेट मैदान लखनउमा भएको खेलमा नेपालले टस जितेर पहिले फिल्डिङ रोजेको थियो । पहिले ब्याटिङ गरेको ‘इन्डिया यू-१९ बी'ले ४९ ओभरमा सबै विकेट गुमाउँदै १६१ रन बनाएको थियो । १६२ रनको विजय लक्ष्य पाएको नेपाल ४३.३ ओभरमा अलआउट हुँदै १२१ रनमै समेटियो ।
सिनियर टोलीमा जस्तै यू-१९ टोलीमा ब्याटिङको समस्याकै कारण नेपाल हार व्यहोर्न बाध्य भयो । नेपालका प्रारम्भिक ब्याट्सम्यानहरु एकपछि अर्को गर्दै पेभिलियन फर्किए ।
३९.१ ओभरमा १०९ रन बनाउँदा ९ औं विकेट गुमाएको नेपालका लागि मलसिंह ऐरीले केही आशा देखाए पनि ४४ औं ओभरको तेस्रो बलमा उनी क्याच आउट भए ।
नेपालका लागि भीम सार्कीले सर्वाधिक ३० रन बनाए । कप्तानसमेत रहेका मोहमद आशिफ शेखले १७, कमलसिंह ऐरीले २२ र पवन सर्राफले १२ रन बनाए । अन्यले दोहोरो अंकको स्कोर गर्न सकेनन् ।
‘इन्डिया यू-१९ बी' लाई १६१ रनमा रोक्ने क्रममा कमलसिंह ऐरीलेले ३ र पवन सर्राफले २ विकेट लिए । किशोर महतो, सम्सद आलम र सागर ढकालले १-१ विकेट लिए ।
प्रतिक्रिया दिनुहोस !
