महेन्द्रनगर : कञ्चनपुरमा फेरि एक १० वर्षीया बालिका बलात्कारको शिकार भएकी छन् । महाकाली नगरपालिकाकी १० वर्षीया बालिका मंगलबार साँझ बलात्कारको शिकार भएकी हुन् । उनलाई स्थानीय ४० वर्षीय युवकले बलात्कार गरेको प्रहरीले जनाएको छ ।
कञ्चनपुरका प्रहरी प्रवक्ता डीएसपी कृष्णराज ओझाले साँझ बालिकालाई ४० वर्षीय युवकले बलात्कार गरेको जानकारी दिएका छन् ।
धानबारीमा लगेर बालिकालाई बलात्कार गरेको खुल्न आएको प्रहरीले जनाएको छ । बालिकाले घरपरिवारलाई जानकारी गराएपछि तत्काल अभिभावकहरुले प्रहरीलाई खबर गरेका थिए ।
प्रहरी तत्कालै घटनास्थलमा पुगेपछि चारैतिरबाट घेरा हालेर अभियुक्तलाई धानबारीबाटै पक्राउ गर्न सफल भएको इलाका प्रहरी कार्यालय दोधारा चाँदनीका प्रहरी निरीक्षक नरेन्द्रबहादुर चन्दले जानकारी दिए ।
इलाका प्रहरी कार्यालयदेखि करिब ३ किलोमिटरको दुरीमा बालिका बलात्कारको शिकार भएकी हुन् । पक्राउ पर्नेमा महाकाली नगरपालिकाका ४० वर्षीय आइते सुनार रहेका छन् ।
धामीझाँक्री लगायतका काम गर्ने ती युवक पहिलेदेखि नै अन्य अपराधिक घटनामा समेत जोडिएको खुल्न आएको प्रहरीले जनाएको छ । ‘बालिकालाई राति नै महाकाली अञ्चल अस्पताल ल्याएर स्वास्थ्य चेकजाँच गराईएको छ’, प्रहरी निरीक्षक चन्दले भने, ‘स्वास्थ्य जाँचपछि परिवारको जिम्मा लगाइएको छ ।’
पक्राउ परेका युवकलाई करणी कसुरसम्बन्धी मुद्दा दायर गरेर अदालतबाट १० दिन म्याद थप गरी कारबाही प्रक्रिया अघि बढाइएको प्रहरी निरीक्षक चन्दले जानकारी दिए । कञ्चनपुरमा दिनदिनै बलात्कारका घटना हुन थालेपछि सरोकारवाला चिन्तित बनेका छन् ।
प्रतिक्रिया दिनुहोस !
