काठमाडौं : साफ च्याम्पियनसिप फुटबलको सेमिफाइनलमाथि जान नसकेको नेपालले फेरि उही नियति दोहोर्याएको छ। बंगलादेशको ढाकास्थित बंगबन्धु रंगशालामा बुधबार भएको सेमिफाइनल खेलमा नेपाल माल्दिभ्ससँग ३-० गोलले पराजित भयो।
रक्षापंक्तिको लगातार कमजोरीमा नेपालले गोल खाएको थियो। वर्षाले बिथोलेको खेलमा माल्दिभ्सले पहिलो हाफमा फ्रिकिक गोलमार्फत अग्रता लिएको थियो।
माल्दिभ्सका लागि नवौं मिनेटमा अक्रम अब्दुल घानीले डिबक्स छेउ पाएको फ्रिकिकमा गोल गरेका थिए।
नेपालका विमल घर्तीमगरले माल्दिभ्सका खेलाडीलाई फल खेलेपछि माल्दिभ्सले फ्रिकिकको मौका पाएको थियो। त्यसमा घानीले उत्कृष्ट गोल गरे। माल्दिभ्स प्राविधिक रूपमा निकै बलियो देखिएको थियो।
छोटो पास र आवश्यकताअनुसार बल नियन्त्रणमा अब्बल देखिएको माल्दिभ्सले दोस्रो हाफको अन्तिमतिर दुई गोल थपेको थियो।
माल्दिभ्सका लागि इब्राहिम हसन वाहिदले दुई गोल गरे। इब्राहिमले ८४औं र ८६औं मिनेटमा गोल गरेका थिए। नेपालले पछिल्ला दुवै गोल पनि रक्षापंक्तिकै कमजोरीमा खाएको थियो।
डिबक्सभित्र नेपालका रक्षापंक्तिले बल क्लियर गर्न विलम्ब गर्दा माल्दिभ्सले सजिलै गोल गरेको थियो। खेलभर नेपालले एउटा मात्र सशक्त पोस्ट प्रहार गरेको थियो। दोस्रो हाफको इन्जुरी समयमा विमल घर्तीमगरको लामो प्रहारलाई माल्दिभ्समा गोलरक्षकले पन्च गर्दै विफल पारेका थिए।
नेपालले माल्दिभ्सको बलियो छविलाई यसपटक पनि रोक्न सकेन। नेपाल र माल्दिभ्सबीच योसहित सातवटा भिडन्त भए। तिनमा माल्दिभ्सले पाँचवटा खेल जित्यो भने दुई खेल बराबरीमा रोकिए।
नेपालले यसअघि सन् २०११ को साफ च्याम्पियनसिपमा माल्दिभ्सलाई १-१ गोलको बराबरीमा रोकेको थियो। यसपटक उपाधि जित्न कुनै कसर बाँकी नराख्ने दाबी गरेको नेपाल माल्दिभ्ससँग निरीह साबित बन्यो। माल्दिभ्ससँगको नमीठो हारसँगै नेपालको च्याम्पियनसिप यात्रामा फेरि अन्तिम चारमै पूर्णविराम लागेको छ।
च्याम्पियनसिपमा कठिन मानिएको समूह ‘ए’बाट प्रतिस्पर्धा गरेको नेपालले समूह चरणको पहिलो खेलमा पाकिस्तानसँग २-१ गोलको हार खेपेको थियो। नेपाल दोस्रो खेलमा भुटानलाई ४-० गोलले हराउँदै खेलमा फर्किएको थियो। समूहको अन्तिम खेलमा उत्कृष्ट प्रदर्शन गर्दै आयोजक बंगलादेशलाई २-० गोलले हराएपछि नेपाल समूह विजेता बन्दै सेमिफाइनलमा पुगेको थियो।
यसैगरी माल्दिभ्स समूह ‘बी’को उपविजेताका रूपमा सेमिफाइनलमा पुगेको थियो। तीन टोली सम्मिलित समूहमा माल्दिभ्सले श्रीलंकालाई गोलरहित बराबरीमा रोकेको थियो। दोस्रो खेलमा माल्दिभ्स भारतसँग २-० गोलले पराजित भएको थियो। माल्दिभ्स र श्रीलंकाको समान एक-एक भएपछि माल्दिभ्सले ‘लक्की ड्र’मा श्रीलंकालाई पछि पार्दै सेमिफाइनलमा स्थान बनाएको हो। माल्दिभ्सले सेमिफाइनलमा पुगेर मात्र नेपालविरुद्ध गोल गर्न सकेको हो।
च्याम्पियनसिपले १२औं संस्करण पूरा गर्दा नेपाल सेमिफाइनलमा रोकिएको यो पाँचौंपटक हो। दक्षिण एसियाली मुलुक (सार्क) राष्ट्रको फुटबल खेल विकास गर्ने उद्देश्यले सन् १९९३ मा सार्क गोल्डकपको नाममा (हालको साफ च्याम्पियनसिप) सुरु भएको प्रतियोगितामा नेपाल पहिलो संस्करणमा तेस्रो भएको थियो। त्यसपछि नेपाल सन् १९९९, २०११ र २०१३ मा पनि अन्तिम चारमा रोकिएको थियो।
प्रतिक्रिया दिनुहोस !
