कालिकोट : जिल्ला प्रहरी कार्यालय कालिकोटमा आउने अधिकांश मुद्दामा जाहेरी दिन पीडितले नै नमान्ने गरेका छन् । सुरुमा न्याय माग्न ठाडो निवेदन दिनुपर्ने र पछि पीडित नै पीडकसँग आर्थिक लेनदेनको कुरा मिलेपछि बयान फेर्न जाहेरी नै दिनका लागि नमान्ने गरेको पाइएको हो ।
जिल्ला प्रहरी कार्यालय कालिकोटले चालु आर्थिक वर्षको दुई महिनामै १७ वटा मुद्दा दर्ता गरेको छ । प्रहरी कार्यालयले भदौमा मात्र १४ वटा मुद्दा दर्ता गरेको छ । कार्यालयको तथ्यांकअनुसार विगत दुई आर्थिक वर्षमा जम्मा १ सय ५१ वटा मात्र मुद्दा दर्ता भएका छन् । आर्थिक वर्ष ०७३∕७४ मा ६२ र आव ०७४/७५ मा ४९ वटा मुद्दा दर्ता भएका छन् । तर, चालु आर्थिक वर्षको दुई महिनामा मात्र १७ वटा मुद्दा दर्ता भएका छन् ।
जिल्ला प्रहरी प्रमुख डीएसपी विनोद शर्माले साउन २४ गते जिल्लामा हाजिर भएयता मात्र १५ वटा मुद्दा दर्ता गरेको बताए । उनले चालु आर्थिक वर्षको साउन र भदौमा १७ वटा मुद्दा दर्ता भएको बताए । उनका अनुसार कार्यालयका दर्ता भएकामा जबर्जस्ती करणीमा ७, कर्तव्य ज्यानमा २, सार्वजनिक ३, बहुविवाह ३ र हात्महत्याका २ वटा मुद्दा छन् । उनले ती मुद्दा दर्ता गर्दा पीडितको जाहेर लिन प्रहरीले निकै सास्ती खेप्नुपरेको बताए । उनले भने, ‘यहाँ त सबै मुद्दा लेनदेनमै मिलाउन पीडितबाटै दबाब आउने रहेछ । ठाडो निवेदन दिने, प्रहरी कार्यालयभन्दा बाहिर छलफल गरेर आर्थिक लेनदेनको सहमति भएपछि सहमति कागज गरिदिन पीडित पक्षले नै प्रहरीमा आग्रह गर्छन् ।’
प्रतिक्रिया दिनुहोस !
